Allister blom, maar maan oor Bulle, Haaie
2010-08-10 09:30
Kaapstad – Kaapse rugby-ondersteuners begin wonder of die jarelange bekerdroogte nie dalk eersdaags verbreek gaan word nie, maar Allister Coetzee en sy Westelike Provinsie-rugbyspan weet goed ’n mens moet nie die tamboere te vroeg begin slaan nie.
Die statistieke is indrukwekkend: seges in die eerste vyf Curriebeker-wedstryde van die seisoen en die Streeptruie wat tot dusver gemiddeld 30 punte beter as hul teenstanders is.
Maar dít vertel nie die volle verhaal nie: waarskynlik die twee gedugste ander spanne in die reeks, die Bulle en die Haaie, kom volgende aan die beurt; en Coetzee-hulle sal ook ’n maand sonder die Springbokke Gio Aplon, Juan de Jongh en Francois Louw moet klaarkom.
Tog is die WP-breier baie tevrede.
“Ek was (Saterdag) in Kimberley veral tevrede met die manier waarop die manne enduit aanhou speel het. Dit het vir my die afgelope tyd gevoel asof ons nie twee goeie helftes kon speel nie, maar die spelers het 80 minute lank hul bes gelewer.
“Hulle het die deur behoorlik vir Griekwas toegemaak en hulle g’n kans gegee tot die eindfluitjie geblaas het nie. En ek was ook verheug daaroor dat die ‘balans’ in ons spel regkom...daai drie van Deon (Fourie) nadat ons die bal in ons eie kwartgebied afgeneem het en onmiddellik ons getalle gebruik het.”
Coetzee het dit duidelik net soveel as die ondersteuners geniet, maar sê dat dit nie daarop dui dat die WP halsoorkop met alle besit gaan begin hardloop nie.
“Dis verblydend dat ons die kans benut het toe dit daar was, maar ek glo vas ’n man moet die reg verdien om sulke rugby te speel. Jy draf nie net op die veld en begin slinger die bal rond nie!”
Oor die Bulle is Coetzee beslis: “Daar is nie ’n swak Bul-span nie en ons ken hul psige.
Wat ookal Saterdag op Nuweland gebeur...hulle gaan dit nie vir ons maklik maak nie.
Ek glo ook nie die twee Super14-wedstryde vroeër vanjaar gaan veel verskil aan enige van die spanne maak nie.
“Ons stel in elk geval ons eie standaarde – dis soos ’n gholfspeler wat teen die baan moet meeding, eerder as teen die ander spelers. Ons sal natuurlik die Bokke mis, maar dit gee manne soos Fabian Juries, Tim Whitehead, JJ Engelbrecht en Morgan Newman kans om hul hande op te steek.”
Coetzee sê die WP se kondisionering is uitstekend. “Dis dié dat ons tot dusver nogal gelukkig is met beserings. Ek wil ook nie ouens terughaas nie, maar ek wantrou die storie van spelers aanmekaar rus.
“Ek glo jy raak skerp deur te speel.
“Gee die manne tyd af sodat hulle kan ophou dink aan rugby, maar hoe meer jy speel, hoe beter hanteer jou liggaam die stampe.”
Bly op hoogte van al die jongste sportnuus deur Nuus24Sport op Twitter te volg.
- Die Burger