Allister: 'Nic en Demetri het babaskoene ontgroei'
2011-10-20 10:03
Kaapstad – Een of ander tyd moet jy ophou om ’n baba te wees.
Só kyk Allister Coetzee, hoofafrigter van die Westelike Provinsie, na die 22-tal wat hy Woensdag hier vir Saterdag se Curriebeker-halfeindstryd teen die Goue Leeus aangewys het.
’n Relatief onervare Streeptrui-rugbyspan is twee naweke terug ’n stewige drag slae van 42-25 op die einste Coca-Colapark toegedien.
Toe Coetzee Woensdag gevra is of sy Bok-belaaide agterlyn met sy jong skakelpaar, Nic Groom en Demetri Catrakilis, aan die gang sal kan kom, het hy dié twee se doeke uitgetrek.
“Nee, jissie, ’n speler kan darem nie vir ewig jonk bly nie. Iewers deur die seisoen moet jy darem verby die punt beweeg waar jy as ’n babatjie bestempel word.
“Demetri en Nic het nou al meer as genoeg Curriebeker-rugby gespeel dat hulle sekerlik nie meer as onervare bestempel kan word nie.
Ál verskil is dat hulle nou in ’n halfeindstryd moet uithaal en wys,” het Coetzee gesê.
Maar uithaal en wys is iets wat die WP en die Stormers die afgelope twee seisoene op kritieke tye nié gedoen het nie.
Schalk Burger neem vandeesweek die leiersleisels by Jean de Villiers oor – en hy sê daar is ongetwyfeld nou al genoeg lesse uit mislukte uitklop-wedstryde geleer.
“Ons klomp Bokke het dit nog onlangs (in die Wêreldbeker-toernooi) ervaar – en dis nie lekker nie,” het hy begin.
“Maar buiten vir van die vorige teleurstellings op Curriebeker- en Super Rugby-vlak, het die WP se grootste nederlae hierdie jaar gekom as ons sleg begin het.
Jy kan dan probeer opvang en daar is wedstryde waarin jy uiteindelik wegkom met ’n swak begin. Daardie wedstryde is egter in die minderheid.
“Wat hierdie naweek se wedstryd betref, gaan daar 44 spelers wees wat almal ewe desperaat is. Die vraag is wie die akkuraatste gaan wees in die basiese dinge.
As jy daardie dissipline in jou spel het, sal jy nie ’n swak begin hê nie en gee jy jouself ’n goeie kans om die wedstryd te wen. Dis egter nie veronderstel om maklik te kom nie,” het Burger gesê.
Coetzee het beaam dat hul eerste fasette van meet af aan aansienlik beter sal moet wees as wat dit die naweek teen die Pumas was.
Matt Proudfoot, Coetzee se voorspeler-adjudant, het daardie vrotsigheid aan lusteloosheid toegeskryf. Burger meen egter die vooruitsig van ’n halfeindstryd ontsluit genoeg energie in enige speler.
Wat die enkele veranderinge aan die span betref, keer Tiaan Liebenberg terug as haker.
“Tiaan is nie ’n impakspeler nie, terwyl Deon Fourie ’n reuse-verskil maak wanneer hy later opkom. Daardie kombinasie pas ons vandeesweek beter as om met Deon te begin,” sê Coetzee.
Voorts is Reinhardt Elstadt nie oorweeg nie.
“Ek was dalk ’n bietjie stout toe ek vroeër gesê het daar is ’n kans dat ons hom op slot sal kies,” het Coetzee gesê.
Die WP-span is:
Gio Aplon, JJ Engelbrecht, Jaque Fourie, Jean de Villiers, Bryan Habana, Demetri Catrakilis, Nic Groom, Siya Kolisi, Schalk Burger (k), De Kock Steenkamp, Adriaan Fondse, Brok Harris, Tiaan Liebenberg, JC Kritzinger.
PLAASVERVANGERS: Deon Fourie, Frans Malherbe, Tertius Daniller, Pieter Louw, Louis Schreuder, Juan de Jongh, Conrad Jantjies.
Vir die jongste sportnuus volg Nuus24Sport op Twitter.
– Sport24