All Blacks wys 2013-toetskalender

2012-11-02 10:28

Kaapstad – Die All Blacks sal in 2013 sewe toetse op tuisbodem speel insluitende 'n kragmeting met die Springbokke op Eden Park.

Die Springbokke sal na Auckland moet reis vir aanstaande jaar se Rugbykampioenskap-wedstryd op 14 September om op Eden Park, waar Suid-Afrika laas in 1937 gewen het, teen die Kiwi's uit te draf.

Die All Blacks het vyf van die agt wedstryde teen die Springbokke by dié stadion gewen.

Frankryk gaan ook aanstaande jaar na Nieu-Seeland toer tydens die Junie-toetse.

Die Hane sal die Wêreldkampioene in Auckland (8 Junie), Christchurch (15 Junie) en New Plymouth (22 Junie) pak.

Nieu-Seeland speel gasheer vir twee van die drie Bledisloe-toetse teen Australië. Die een kragmeting is 'n Rugbykampioenskap-wedstryd op 24 Augustus in Wellington en die tweede toets is op 19 Oktober in Dunedin.

Die Poemas pak die All Blacks op 7 September in Hamilton.

Vir die jongste sportnuus volg Nuus24Sport op Twitter.

– Keo