All Blacks oorheers toekenning-seremonie

2012-12-04 07:02

Londen – Die Nieu-Seelandse rugbyspan het die Internasionale Rugbyraad se toekenning-seremonie Maandagaand in Londen oorheers.

Die losskakel Dan Carter het die speler van die jaar-toekenning ontvang, terwyl die span se afrigter, Steve Hansen weggestap het met die toekenning vir afrigter van die jaar.

Die All Blacks is aangewys as die span van die jaar nadat hulle in 20 wedstryde onoorwonne was. Dít het tot 'n einde gekom ná Saterdag se skoknederlaag teen Engeland op Twickenham.

Dit is die tweede keer wat die 30-jarige Carter met die toekenning vereer word. Hy het in 2005 ook dié gesogte eer ontvang.

Ander spelers wat vir die toekenning benoem is, is die All Black-kaptein Richie McCaw, die Engelse losskakel Owen Farrell en die Franse losskakel Frederic Michalak.

Dit is die derde agtereenvolgende jaar wat die All Blacks met die span van die jaar-toekenning wegstap.

– Volg Nuus24Sport op Twitter

- Sapa - AFP