All Blacks: Sonny Bill mag boks

2010-12-15 17:12

Wellington - Nieu-Seeland se rugbybase het die All Black-ster Sonny Bill Williams se planne om sy boksloopbaan te hervat, goedgekeur.

Die 25-jarige Williams sal in sy derde professionele geveg op 29 Januarie aanstaande jaar teen die Australiër Scott Lewis deur die toue klim, het die Nieu-Seelandse rugbyunie (NZRU) gesê.

"Daar bestaan natuurlik 'n gevaar dat hy (Williams) beseer kan word. Maar ons voel dit is die moeite werd om die kans te vat, het Neil Sorensen, die NZRU se algemene bestuurder van professionele rugby aan Radio NZ gesê.

Williams se geveg vind drie weke voor sy nuwe span, die Crusaders, met hul Super15-veldtog begin.

Koerante in Nieu-Seeland het vroeër berig dat Williams se kontrak met die Crusaders ook voorsiening maak vir 'n tweede geveg in April of vroeg Junie.

Sorensen het bevestig dat die NZRU ingestem het om Williams te laat boks as deel van sy kontrak en het bygevoeg dat dit die enigste manier was om te keer dat hy sy kontrak met die Franse klub Toulon hernu.

Bly op hoogte van die jongste sportnuus deur Nuus24Sport op Twitter te volg.

- Sport24