All Black-flank uitgewys wat op speler se kop trap
2012-11-12 14:19
Edinburg – Die All Blacks se afrigter, Steve Hansen, sal Maandag weet of die flank Adam Thomson weens dissiplinêre redes, die res van die Kiwi's se Europese toer gaan misloop.
Nieu-Seeland het Skotland Sondag met 51-22 op Murrayfield in Edinburg geklop.
Thomson loop die gevaar om geskors te word nadat hy tydens die wedstryd uitgewys is toe hy na bewering op die losvoorspeler Al Strokosch se kop getrap het.
Skotland se afrigter, Andy Robinson, het dit duidelik gestel dat hy voel die telbord kon anders gelyk het as Thomson 'n rooi- in plaas van 'n geelkaart gekry het.
"Die assistent-skeidsregter het baie duidelik gesien wat gebeur het, maar dit is nou in die hande van die tugbeampte," het Robinson gesê.
Hansen meen egter die oortreding is nie so ernstig as wat dit op die televisie gelyk het nie.
"Iemand sal deeglik daarna kyk en besluit of dit opsetlik of net onverantwoordelik was. Ek dink dit was net onverantwoordelik," het Hansen verduidelik.
Thomson kan die All Blacks se opkomende toetse teen Italië, Wallis én Engeland misloop indien hy geskors word.
Vir die jongste sportnuus volg Nuus24Sport op Twitter.
– Sport24
