All Black-flank uit Ierland-toets

2012-06-12 08:58

Wellington – Die All Black-flank Victor Vito sal Saterdag se tweede toets teen Ierland weens 'n kniebesering misloop en kan straks vyf weke op die krukkelys wees.

Adam Thomson, wat Vito vervang het toe hy die veld tydens Nieu-Seeland se 42-10 oorwinning in die eerste toets teen die Iere moes verlaat, sal in die nr.6-trui uitdraf vir die wedstryd in Christchurch.

Vito sal ook die derde kragmeting in Hamilton op 23 Junie misloop, maar die Chiefs se losvoorspeler Liam Messam sal hom by die groep aansluit as plaasvervanger.

Intussen het die All Blacks-breier, Steve Hansen, gesê die haker Keven Mealamu het van 'n kuitbesering herstel wat hom uit die eerste toets gehou het.

Die 33-jarige Mealamu het reeds 92 toetse op sy kerfstok en benodig nog een wedstryd om Sean Fitzpatrick as Nieu-Seeland se haker met die meeste toetse verby te steek.

Nieu-Seeland het Dinsdag in ysige weer geoefen en soortgelyke toestande word vir Saterdag voorspel.

Vir die jongste sportnuus volg Nuus24Sport op Twitter.

- AP