Aktiviste sê Nam moet uit WB
2011-05-16 14:14
Johannesburg - 'n Diereregtegroep dring daarop aan dat Namibië uit vanjaar se Wêreldbeker-rugbytoernooi in Nieu-Seeland onttrek.
Die Seals of Nam-groep hoop dat die onttrekking meer aandag sal vestig op die uitdunning van robbe aan die Namibiese kus.
"Ons doen 'n formele beroep op die Internasionale rugbyraad (IRR) om al Namibië se wedstryde by vanjaar se Wêreldbeker af te stel," het die groep in 'n verklaring wat glo na die IRR asook die Suid-Afrikaanse rugbyunie gestuur is, gesê.
"Ons vra ook die spanne van Suid-Afrika, Wallis en Fidji om hul solidariteit te wys deur saam te staan en die uitdunning van robbe in die openbaar te veroordeel," het die verklaring verder gelui.
Dit is die derde agtereenvolgende jaar wat Namibië se ministerie van visserye 'n kwota het om meer as 90 000 bedreigde Kaapse pelsrobbe te slag.
Volgens Seals of Nam word 85 000 welpies en 6 000 bulle jaarliks by Kaapkruis en Atlasbaai doodgemaak.
Namibië is een van slegs vyf lande in die wêreld wat robbe uitdun.
Die land se nasionale rugbyspan speel hul Wêreldbeker-groepwedstryde teen Wallis, Suid-Afrika en Fidji.
Volg Nuus24 op Twitter.
- SAPA