Afrika beste in die wêreld
2011-10-25 09:32
Auckland – Cecil Afrika is nou amptelik die beste sewesrugbyspeler ter wêreld.
Dié Oos-Kapenaar se briljante vertonings in die 2010-’11-seisoen van die Internasionale Rugbyraad (IRR) se Sewesreeks is Maandag hier deur die IRR vereer toe hy as sewesrugbyspeler van die jaar aangewys is.
Afrika se vertonings was in ’n klas van sy eie.
Hy het as top-driedrukker en voorste puntemaker in die reeks geëindig, al het hy slegs in sewe toernooie gespeel.
Hy het 40 drieë gedruk en 385 punte aangeteken en die Blitsbokke gehelp om toernooie in Las Vegas, Londen en Edinburg te wen.
Die Blitsbokke se afrigter, Paul Treu, het in reaksie gesê hy is baie trots op Afrika.
“Ek is bitter bly dat hy die toekenning kon kry.
“Hy was werklik uitstaande.”
Afrika is beseer nadat hy onlangs sy wangbeen gekraak het, dieselfde besering wat hom verlede seisoen gekortwiek het.
Hy sal na verwagting die 2011-’12-seisoen se openingstoernooi – in Australië – misloop, maar kan betyds fiks wees as Emirates se toernooie in Dubai en Port Elizabeth vroeg in Desember gespeel word.
* Tydens die toekenningsaand is vier Suid-Afrikaners in die IRR se heldesaal opgeneem. Kitch Christie, Jake White, Francois Pienaar en John Smit, die afrigters en kapteins van Suid-Afrika se Wêreldbeker-seges in 1995 en 2007, is op dié wyse vereer.
Vir die jongste sportnuus volg Nuus24Sport op Twitter.
– Sport24