Absa ontsteld oor baie wittes in rugbyspanne
2010-09-17 08:04
Johannesburg - Absa, een van die Suid-Afrikaanse Rugby-unie (Saru) se grootste borge, is ontsteld oor sommige oorwegend wit spanne in die Curriebeker-reeks.
Die kommer van die Curriebeker-reeks se borg oor Saru se “ernstige gebrek aan toewyding met transformasie” het Saru se president, mnr. Oregan Hoskins, genoop om ’n brief aan al die unies te stuur waarin hy versoek dat dié toedrag van sake getakel word.
In dié brief, wat vroeër vandeesweek aan die 14 unies se provinsiale presidente en uitvoerende hoofde gestuur is en waarvan Beeld ’n afskrif het, vra Hoskins sy lede (provinsies) om onmiddellik iets aan die skynbare gebrek aan transformasie te doen.
Hoskins sê Absa, as huidige en toekomstige borg van rugby, is onder meer ontevrede oor die gebrek aan transformasie in rugby.
Absa borg die Curriebeker-reeks en gaan ook die Springbokke se nuwe truiborg wees as die bestaande kontrak met Sasol einde vanjaar verval, hoewel dit nog amptelik aangekondig moet word.
“Tot nou toe het slegs politici oor die gebrek aan swart spelers in ons spanne gekla, maar nou, vir die eerste keer, het ’n borg ook sy kommer daaroor uitgespreek,” skryf Hoskins.
“As ons borge by dié aspek van die spel betrokke raak, moet dit geweldige kommer veroorsaak.”
Hoskins bevestig ook in die brief dat Absa die nuwe truiborg gaan word.
“Ons het onlangs ’n memorandum van verstandhouding met Absa onderteken om vir die volgende vyf jaar ons nasionale span se borg te word.
“Ons spanne se samestelling bedreig dus direk ons vermoë om die steun van sakeondernemings te behou,” skryf Hoskins.
Veral die Leeus, die Blou Bulle en die Cheetahs is deur Hoskins uitgesonder.
In die brief word gesê Johan Prinsloo, uitvoerende hoof van Saru, het die kwessie van transformasie ook onlangs in ’n brief aan die unies aangeroer.
Happy Ntshingila, Absa se uitvoerende direkteur vir bemarking en korporatiewe sake, het gesê die maatskappy ondersteun Saru se pogings om transformasie in rugby te bevorder, berig Daniëlla du Plooy.
“As borge wil ons graag die versnelling van transformasie in rugby sien en ons sal alle poging om dít te bewerkstellig, ondersteun.”
Ntshingila het lof gehad vir Saru se pogings om die sportsoort in die townships te bevorder.
“Tog reken ons transformasie kan nie tot die speelveld beperk word nie, maar moet dit na elke vlak van die samelewing oorvloei.”
- Wat is jou opinie oor transformasie in sport? Stuur jou brief vir publikasie na terugvoer@nuus24.com. Lees op ons Facebook-blad (www.facebook.com/Nuus24) wat nog van ons lesers dink oor dié berig.
- Bly op hoogte van al die jongste sportnuus deur Nuus24Sport op Twitter te volg.
- Sport24