G’n sport bestand teen aanslag van rykes...
2011-03-02 09:25
Die eenvoud van sokker spreek die ganse planeet aan.
Almal wat al die voorreg gehad het om in Thailand te reis, weet van die derduisende kroegies wat in geradbraakte Engels adverteer dat hulle Dinsdagaand Everton teen West Brom en Rambo III op hul TV’s vertoon, Woensdagaand Liverpool teen Scunthorpe en Stephen Seagal: Under Siege, ensovoorts ensomeer.
Dis nie sokker-uitgehongerde Britse toeriste wat die plastiekstoeltjies volsit nie, maar Thai’s self, wat ’n oënskynlik onversadigbare dors na vyfderangse Amerikaanse skop-skiet-en-dônner films en die Engelse Premierliga het.
Thai-sokker is natuurlik (nog) nie veel om oor huis toe te skrywe nie, maar daar’s geld te maak in ’n land met 65 miljoen potensiële entoesiaste, al sien jy meer gereeld 0-0 as toe jy laas by die oogarts was.
Muang Thong United, die top-klub, se borge sluit Thai Air, Coke, Yamaha en die Phyatai-hospitaal in. Die berugte afgesette gewese president, Thaksin Shinawatra, het ’n paar jaar gelede steun probeer wen deur Manchester City aan te skaf.
Die Noord-Engelse klub het terstond drie Thai-sokkerspelers gekontrakteer, vir foto’s laat poseer in City se ligblou trui en onmiddellik weer van hulle vergeet.
Die groot geld ter sprake lok spanne met minder welluidende name soos Army, Navy, Bangkok Glass en TOT, laasgenoemde synde ’n telefoon-maatskappy.
Buriram is ’n dorpie met minder as dertigduisend siel, 400 km noordoos van die yslike Bangkok, en het op die oog af nie veel kans op sukses teen die groot honde van die Thai-Premierliga nie. Maar ook in die Land Van Glimlagte kan jy ver vorder met ’n ryk weldoener.
In dié geval het ’n voormalige trawant van oudpres. Thaksin, die wonderlik benaamde Newin Chibchob, die finansieel sukkelende Premierliga-klub Ayutthaya PEA gekoop en doodeenvoudig na sy tuisdorp laat trek.
Nou’s daar konsternasie. Die nuwe Buriram PEA is ’n krag om mee rekening te hou.
Chibchob betaal vir sy ondersteuners se kaartjies en vervoer wedstryde toe en besoekers aan die stadion bygenaamd die Donderweer-kasteel kry gereeld kous oor die kop.
Chibchob se vrou, Karuna (wat “asseblief” in Thai beteken), is PEA se geesdriftige rasieleier. Sy is ook eienaar van Buriram se sukkelende ander klub, wat eensklaps nie meer sukkel nie. Want sien, sodra Buriram FC iewers kleitrap, leen Buriram PEA hom die nodige spelers. Bevordering na die Premierliga lyk nou ook vir FC onvermydelik.
Manlief en Vroulief, in elke opsig “binne gemeenskap van goed” getroud, illustreer ’n moderne waarheid: g’n beroepsport op aarde kan werklik bestand bly teen die aanslag van ryk mans op soek na eksotiese speelgoed nie. En wat is cooler as jou eie sokkerklub?