Wêreld se oë op Londen vir Spele-opening
2012-07-27 20:18
In-diepte Verslae
Te midde van aantygings van dissiplinêre probleme onder Australië se Olimpiese swemmers, het een swemmer haar spanmaats as "kinderagtig" beskryf.
Die trane van blydskap het behoorlik onder Suid-Afrikaners gevloei oor Chad le Clos se goue oomblik. Kyk hier na die video.
Londen – Klokke het laat Vrydagmiddag oor Brittanje heen gebeier terwyl die Olimpiese vlam op 'n koninklike vaartuig in die Teemsrivier afbeweeg het in die finale ure voor die begin van die Olimpiese Spele se openingseremonie.
Die Olimpiese fakkel is op die Gloriana, Koningin Elizabeth II se trekskuit, in die Teemsrivier afgeroei vir die laaste skof van 'n reis van 12 800 km deur Brittanje en Ierland.
Die vlam se lang tog, wat op 10 Mei in Griekeland begin het, sal eindig by wat beloof om een van die skouspelagtigste openingseremonies in die geskiedenis van die Spele te wees by die Olimpiese Stadion in Stratford in die ooste van Londen.
David Cameron, die Britse premier, het gesê Brittanje moet die meeste maak van dié unieke geleentheid.
"Brittanje is gereed om die grootste skouspel op die aarde te verwelkom," het hy aan verslaggewers gesê.
"Ons het 'n goeie verlede, 'n baie opwindende toekoms en hierdie is 'n groot oomblik vir ons land. Ons moet dit aangryp."
Duisende belangrike gaste, insluitend die Russiese premier, Dmitry Medvedev, die Amerikaanse presidentsvrou, Michelle Obama, en die Hollywood-ster Angelina Jolie, sal die seremonie bywoon.
Meer as 'n miljard mense sal na verwagting die skouspel op televisie volg.
Organiseerders wou nie onthul hoe die vlam by die seremonie sal aankom nie. Die identiteit van die laaste fakkeldraer is ook nie bekend nie, maar gerugte doen die ronde dat dit die Olimpiese roeikampioen Steve Redgrave of Roger Bannister, die eerste man om 'n myl in minder as vier minute te hardloop, sal wees.
Die Britse sokkerster David Beckham het onthul dat hy ook 'n rol in die seremonie sal hê.
– Vir die jongste sportnuus volg Nuus24Sport op Twitter.
- Sapa - AFP
