Van Wyk was rêrig aan die slaap agter paaltjies!
2011-03-16 08:06
In-diepte Verslae
Die krieketbaas Gerald Majola het ontken dat hy toestemming verleen het aan Graeme Smith om nie direk ná die Wêreldbeker terug te keer na SA nie.
Graeme Smith en Jacques Kallis is van die gedugste opponente teen wie hy ooit te staan gekom het, skryf die Australiër Matthew Hayden in sy lewensboek.
Kolkata. – Morné van Wyk het nie net gelýk of hy aan die slaap was agter die paaltjies tydens die Proteas se riller-sege teen Indië nie – hy wás.
Die paaltjiewagter van die Suid-Afrikaanse span het Saterdag ’n nagmerrie-wedstryd beleef toe hulle die Indiërs in Nagpur op dramatiese wyse geklop het – en dit was te wyte aan ’n slaappil.
Hy het drie vangkanse verbrou, waaronder een van die tuisspan se aanvangskolwer Virender Sehwag met sy telling op net vier. Sehwag het eindelik 73 aangeteken.
Van Wyk kon daarna ook net vyf lopies bydra tot die Suid-Afrikaners se soeke na 297 lopies.
Lerato Malekutu, die Protea-woordvoerder, het Dinsdag by navraag bevestig dat Van Wyk kort voor die wedstryd per ongeluk ’n slaappil gesluk het.
“Dit klink asof Morné die slaappil met ’n vitamienpil verwar het,” het Malekutu gesê. “Teen die tyd dat hy sy fout besef het, was die wedstryd al byna aan die gang. Hy het met moeite wakker gebly.”
Die 31-jarige Bloemfonteiner het Dinsdag in die Proteas se voorlaaste groepwedstryd teen Ierland vergoed vir dié glips.
Danksy sy warrelwind-beurt van 42 lopies en ’n amper-honderdtal deur JP Duminy (99) kon die Suid-Afrikaners ’n stewige 272/7 aanteken.
Van Wyk het daarna boonop vier vangkanse agter die paaltjies benut, insluitend ’n skitter-vangskoot om van die tiende paaltjie ontslae te raak.
Die Iere is vir net 141 uitgeknikker en dit het die Suid-Afrikaners ’n sege met 131 lopies besorg.
Daarmee is die Proteas nou verseker van ’n plek in die kwarteindronde van WB 2011 én het hulle boonop die boonste plek in Groep B ingeneem.
Volgens Graeme Smith, die Protea-kaptein, is dít ’n “reuse-verligting”.
“Die res van die spanne gaan dié week behoorlik spook om te probeer deurdring en dis fantasties om nie eens bekommerd hoef te wees oor wat moontlik kan gebeur nie,” het hy gesê.
“Ons is nie bekommerd oor wie ons in die kwarteind moet pak nie, want jy móét dié wedstryd wen om aan te beweeg – ongeag wie jou teenstander is.”
Smith-hulle kom Saterdag in Dhaka vir oulaas teen Bangladesj te staan, waarna ’n uitklopwedstryd teen Australië, Pakistan, Nieu-Seeland of Sri Lanka wag.
Vir die jongste sportnuus volg Nuus24Sport op Twitter.
- Sport24
