Wit bal vir dag-aand-toets
2010-04-21 15:29
Londen – Wit krieketballe gaan dalk gebruik word vir die nuwe dag-aand-toetse wat binnekort in Engeland gespeel gaan word, het die bestuurder van die Internasionale Krieketraad (IKR), Dave Richardson, gesê.
Toetslopies met ‘n pienk bal is vroeër vanjaar in Engeland, Australië en die Wes-Indiese eilande geneem wat spelers in staat sal stel om in wit uniform onder spreiligte te speel.
Die tradisionele rooi bal in krieket is moeilik sigbaair onder dié ligte.
Wit balle word suksesvol in dag-aand-eendagwedstryde gebruik, maar dan speel die spelers in 'n gekleurde uniform.
Richard het gesê ‘n gepaste bal sal wel betyds gevind word vir die aanvang van volgende jaar se Engelse krieketseisoen.
Die uitvoerende hoof van die IKR, Haroon Lorgat, het aan Reuters gesê die verandering van die wit uniform in toetskrieket sal deeglik bespreek moet word.
“Dit is ‘n debat waaraan ons graag sal wil deelneem. Ek byvoorbeeld sal graag die wit uniform wil behou,” het Lorgat gesê.
Swak bywoningsyfers vir die langer weergawe van krieket het daartoe gelei dat die IKR besluit het om wedstryde aan te bied tydens meer ondersteuner-vriendelike tye.
- AFP