Wayne Parnell vasgetrek by 'dwelmparty'

2012-05-21 10:30

Kaapstad – Die Suid-Afrikaanse krieketspeler Wayne Parnell en Indië se Rahul Sharma is Sondagaand by 'n partytjie in Moembaai in hegtenis geneem, het Times Live Maandag berig.

Volgens berigte is die spelers, wat albei vir die Pune Warriors in die Indiese Premierliga speel, ondervra en gedwing om mediese toetse te ondergaan waarna hulle later vrygelaat is.

Die polisie het 'n klopjag uitgevoer nadat vermoed is dat dwelms by die partyjie gebruik is.

Kokaïen is op die perseel gevind.

Minstens 100 gaste, die meeste van hulle buitelanders, is saam met die twee spelers deur die polisie aangehou.

Sommige van die gaste beweer egter dat geen onwettighede plaasgevind het nie.

"Die polisie kom gereeld hier aan om platejoggies weg te neem. Ek het buite gestaan en na 'n wedstryd gekyk toe ek die polisie sien inkom. Ons is voorgekeer toe ons wou loop. Baie partytjies word hier gehou. Ons het niks verkeerd gedoen nie," het een van die gaste gesê.

Verlede week is die Australiese krieketspeler Luke Pomersbach aangekla dat hy 'n vrou gemolesteer het en haar verloofde in 'n hotel in Nieu-Delhi aangerand het, het Sport24 berig.

Vroeër is vyf IPL-spelers geskors vir beweerde wedstrydknoeiery.

Lees verder.

– Times Live