Watson sit weer uit vir Proteas-toets
2012-11-21 08:15
Adelaide – Australiese keurders het besluit om nie hulle nasionale span se beseerde onderkaptein, Shane Watson, in te sluit in die onveranderde span wat in die tweede toets teen Suid-Afrika sal speel nie.
Die wedstryd begin Donderdag.
Watson het die eerste toets in Brisbane ook misgeloop weens 'n kuitbesering, en kon dié week in oefensessies in Adelaide nie die keurders oortuig dat hy gereed is om weer te speel nie.
Michael Clarke, kaptein van die Australiërs, het Woensdag gesê keurders is in dié stadium nie oortuig dat Watson gereed is om sy gewone posisie in te neem nie.
Watson het volgens Clarke "oor die laaste paar dae baie verbeter... maar sal waarskynlik eers oor 'n paar dae weer 100 persent wees."
Só lyk Australië se span:
Michael Clarke (kaptein), David Warner, Ed Cowan, Rob Quiney, Ricky Ponting, Mike Hussey Matthew Wade, Peter Siddle, James Pattinson, Nathan Lyon, Ben Hilfenhaus, Mitchell Starc.
– Vir die jongste sportnuus volg Nuus24Sport op Twitter.
- Sapa - AP
