Warriors mor oor kolfblad
2009-12-01 15:38
Altus Momberg
Kaapstad - Die Warriors het die tweede keer dié seisoen ’n bloutjie geloop met ’n kolfblad wat nie op standaard was nie.
Die Oos-Kaapse streekspan het die afgelope naweek met nege paaltjies teen die Cape Cobras in die Paarl verloor nadat hy vir net 143 lopies in elk van sy twee beurte uitgeboul is.
Russell Domingo, die Warriors se breier, het gister gesê dit was ’n swak kolfblad, met aflewerings wat sommer al op die eerste dag deurgerol het.
“Ons het twee weke gelede 350 lopies in 57 boulbeurte gemoker (om ’n wedstryd teen die Diamond Eagles te wen). Ons is ’n goeie span en nie sommer een wat twee keer vir 140 uitgeboul word nie,” sê Domingo.
Die Paarl se kolfblad is berug dat hy stadig is met min wip en dit is normaalweg bitter moeilik om ’n uitslag af te dwing.
Die naweek se wedstryd het egter nie eens die vierde dag gehaal nie.
Die Cobras se breier, Shukri Conrad, het toegegee dat die blad nie die beste was nie.
“Dit was beslis meer oneweredig as in die verlede. Die blote feit dat daar 15 been voor paaltjie-beslissings in die drie kolfbeurte was, wys dit,” sê Conrad.
“Ons het egter baie goed geboul en glo dat ons beter krieket oor die drie dae gespeel het.”
Die Dolphins is die ander span wat die naweek gewen het, met Loots Bosman wat ’n reuse-ses gemoker het om die sege oor die Lions te beklink.
Die Dolphins het 2 lopies benodig met Bosman op 94. Hy het toe met een hou seker gemaak van die oorwinning én sy honderdtal.
Die Warriors is steeds tweede op die SuperSport-reeks se puntelys, maar die nederlaag teen die Cobras beteken dat volgende naweek (10 Desember) se wedstryd teen die voorlopers, die Titans, van deurslaggewende belang kan wees.
Die Titans en die Lions is dié naweek slaags in Centurion, terwyl die Cobras en die Diamond Eagles mekaar hier op Nuweland pak.
Dit was juis teen die Titans waar die kolfblad die Warriors ook opgekeil het.
Die wedstryd in Benoni is in Oktober afgelas nadat die kolfblad nie op standaard was nie. Dit is dié wedstryd wat volgende naweek weer gespeel moet word.
Hierdie keer word dit egter in die Baai beslis.
- Die Burger