Warriors-duo reik na die sterre
2010-01-26 14:07
Johannesburg - Die Chevrolet Warriors-duo, Colin Ingram en Rusty Theron staan albei heel voor in die ry om as die MTN40 Krieketspeler van die jaar aangewys te word.
Die toekenning sal aan die einde van die krieketseisoen by Krieket Suid-Afrika (KSA) se professionele toekenningseremonie oorhandig word.
Die toekenning word op die speler se prestasie deur die reeks gebaseer.
Ingram het die meeste lopies tydens die kompetisie ingepalm, terwyl Theron die meeste paaltjies platgetrek het.
Dit is egter nie te sê dat dié toekenning aan enige speler in die Warriors of die Nashua Dolphins gaan nie, wat Vrydag in die finaal teen mekaar te staan kom.
In die afgelope vyf seisoene van franchise-krieket was Roelof van der Merwe die enigste speler van 'n wenspan wat dié toekenning gewen het.
Dit was ’n belangrike mylpaal in dié speler se lewe, want sy prestasie het hom ’n plek in die Suid-Afrikaanse krieketspan besorg.
Die ander wenners wat al met dié toekenning weggestap het, is Justin Kemp (Nashua Titans), Stephen Cook (Highveld Lions), Morne van Wyk (Chevrolet Eagles) en Theron in 2008.
Nóg ’n speler wat ook ‘n goeie vertoning gedurende die reeks gelewer het, is Robin Peterson van die Nashua Cape Cobras, wat uitstekend met beide die kolf en die bal gevaar het. Hy het ook ‘n groot rol gespeel om sy span tot in die semi-finaal te kry.
- Sapa