Warne wéér beboet
2013-01-21 09:54
Melbourne – Die veteraan-draaibalbouler Shane Warne is met $5 250 (sowat R47 000) beboet ná hy tydens die halfeindronde van die Australiese Big Bash T20-toernooi die spelers se gedragskode oortree het.
Warne, kaptein van die Melbourne Stars, het in die halfeindronde besluit om sy kapteinskap aan sy spanmaat, James Warner, oor te dra omdat hy bang was dat hy geskors kan word omdat sy span te stadig boulbeurte afgestuur het.
Krieket Australië het besluit dat die oordrag van kapteinskap ‘n oortreding van die gedragskode was.
Warne, wat al voorheen gewaarsku is oor sy span se stadige boulwerk, kon vir een wedstryd geskors word indien sy span weer te stadig geboul het.
“Ek het geen idee gehad oor die reël nie,” het Warne later op Twitter laat hoor.
“Ek moes voor die tyd ingelig word deur my bestuurspan.”
Die Melbourne Stars se uitvoerende hoof, Clint Cooper, het gesê hy aanvaar dat Warne nie geweet het van die reël nie en dat hy en die spanbestuurder, Ben Robertson, die verantwoordelikheid vir die misverstand moet deel.
Warne is vroeër in die toernooi met R40 000 beboet ná 'n onderonsie met Marlon Samuels tydens 'n wedstryd in Melbourne.
– Vir die jongste sportnuus volg Nuus24Sport op Twitter.
- Sapa - AP
