Vrae oor Kallis en kie se ruskans
2012-02-08 07:00
Kaapstad. – Gaan Suid-Afrika se krieketspan in Nieu-Seeland dieselfde fout begaan as dié waaraan Engeland homself in die onlangse reeks in Doebai skuldig gemaak het?
Drie van Suid-Afrika se senior spelers, Graeme Smith, Jacques Kallis en Dale Steyn, gaan geen krieket speel voor hul eerste t20-wedstryd teen Nieu-Seeland, op 17 Februarie in Wellington, nie.
Andy Flower, Engeland se breier, het juis Dinsdag die blaam vir sy span se skokkende vertoning in die toetsreeks teen Pakistan in die Verenigde Arabiese Emirate op sy span se gebrek aan voorbereiding geplaas.
“Ek dink een van die verskille tussen die twee spanne (Engeland en Pakistan), is dat ons vir twee maande by die huis gesit en rus het, terwyl hulle ’n moeilike reeks teen Sri Lanka gespeel het,” het hy gesê.
Die drie senior spelers is nie deel van Suid-Afrika se twintig20-groep vir die drie wedstryde teen die Kiwi’s nie en vertrek eers volgende Vrydag na Nieu-Seeland.
Mohammad Moosajee, die Proteas se spanbestuurder en –dokter, het bevestig dat die drie spelers steeds rus en nie beskikbaar is om die naweek vir die Cape Cobras teen die Lions in Johannesburg in ’n beslissende SuperSport-kragmeting te speel nie.
“Daar wag ’n baie harde jaar op die spelers en hulle is midde ’n tydperk van 14 maande waar ons amper 13 maande lank krieket speel. Ons is baie versigtig met die spelers en het ’n program om te probeer verseker dat hulle reg sal wees om in die belangrike wedstryde te speel. Ons is nog meer versigtig met sleutelspelers soos dié drie,” het Moosajee gesê.
Dit beteken dat Kallis en Steyn hul laaste mededingende krieket op onderskeidelik 14 en 17 Januarie gespeel het.
Hulle sal dus meer as vyf weke geen krieket gespeel het nie voor die Proteas se eerste van drie kitswedstryde, op 25 Februarie in Wellington.
Of Suid-Afrika die prys vir die besluit gaan betaal, sal gesien word. Dit maak beslis nie die Cobras se taak maklik vir die beslissende stryd teen die Lions op die Wanderers nie.
Die Cobras is minder as ’n punt voor die Titans op die puntelys en móét wen om die derde agtereenvolgende seisoen as kampioen gekroon te word.
Die Titans speel teen die Dolphins in Centurion en die twee spanne sal mekaar se vertonings met valkoë dophou.
Die Cobras sal ook sonder vier van hul beste spelers moet klaarkom. JP Duminy, Justin Ontong, Richard Levi en Robin Peterson vertrek Vrydag saam met die Proteas se t20-groep na Nieu-Seeland en is nie beskikbaar nie.
Die Cobras kan wel op die twee toetsspelers, Mark Boucher en Vernon Philander, se knoppies druk vir die stryd teen die Lions, terwyl die naatbouler Rory Kleinveldt ook weer reg is ná ’n bobeenbesering.
– Sport24
– Bly op hoogte van al die jongste sportnuus deur Nuus24Sport op Twitter te volg