Vinnige Fanie besing nuwe boulheld
2011-12-27 09:24
Durban – ’n Blink toekoms wag op Marchant de Lange, die Proteas se nuutste snelboul-sensasie, míts die nasionale krieketkeurders hom in watte toedraai.
Só het Fanie de Villiers, ’n gewese Suid-Afrikaanse paaltjievraat, gesê nadat dié 21-jarige Pretorianer gister hier op Kingsmead vier Sri Lankaanse paaltjies in sy eerste toets platgetrek het.
Dié Tzaneen-boorling het sy speelkans gekry nadat Vernon Philander, die Proteas se held op SuperSportpark, weens ’n kniebesering onttrek moes word. Hy het die besoekende kolwers (veral in sy geniepsige eerste boulskof) met kartetse van diep in die 140 km/h laat bontstaan.
“Marchant herinner nogal aan ’n jong Tertius Bosch met sy kort aanloop en plofbare boul-aksie,” het De Villiers, wat 85 slagoffers in 18 toetse geëis het, aan Sport24 gesê.
“Hy is ’n sterk jongman en bewerkstellig die meeste van sy spoed uit sy skouers, wat beteken dat hy nie veel van ’n aanloop nodig het om op sy vinnigste te boul nie.”
Bosch is in 2000 oorlede ná ’n indrukwekkende eersterangse loopbaan, waarin hy 210 paaltjies teen ’n gemiddelde van net minder as 28 platgetrek het.
Volgens De Villiers kan dié vertoning veral vir Morné Morkel, wat die afgelope maand of wat gesukkel het, effens onrustig laat slaap.
“Dis ’n gesonde situasie vir die land se keurders, want nou is daar uiteindelik iemand van gehalte wat ook druk kan plaas op Dale (Steyn), Vernon en Morné,” het hy gesê.
“Dale lei die aanval nou al baie jare lank en Vernon se onlangse vertonings maak van hom die man in die saal. Dít beteken dat Morné sal moet begin paaltjies plattrek as hy steeds die derde naatbouler wil wees.”
De Villiers waarsku dat De Lange hom eers in bouler-onvriendelike toestande moet bewys.
“Hy was baie indrukwekkend – veral met sy vaart, maar dié was net een boulvertoning en ons moet geduldig wees met hom, want krieket is ’n vreemde spel.
“Môre boul hy op ’n mak blad en kry hy dalk geen paaltjies nie.”
– Vir die jongste sportnuus volg Nuus24Sport op Twitter.
– Sport24