Van Wyk in SA se planne vir T20-WB
2012-03-27 07:01
Bloemfontein – Selfs al speel Morné van Wyk nie Vrydag vir die Proteas teen Indië nie, is hy vanweë sy veelsydigheid ’n sterk aanspraakmaker om weer die krieketgroep vir die T20-Wêreldtoernooi te haal.
Die feit dat hy as ’n aanvangskolwer én ’n paaltjiewagter betrek kan word, tel in sy guns.
Dit is ook só in ’n oproep deur die SA keurderbaas, Andrew Hudson, aan Van Wyk verduidelik.
“Dis altyd lekker om so ’n oproep te kry,” het Van Wyk gesê.
“Ek het nie enige verwagtinge gehad om weer betrek te word nie nadat ek aan die begin van die seisoen nie genooi is om saam met die vergrote groep (by Arabella) saam te trek nie.”
Intussen sal Jacques Kallis se deelname aan sy gedenkwedstryd teen Indië bepaal wie die paaltjiewagter in dié blitswedstryd Vrydag op die Wanderers gaan wees.
Kallis moes hom met ’n stywe nek aan die laaste toets teen Nieu-Seeland onttrek.
Die nasionale span land môremiddag in Johannesburg.
As Kallis steeds ongemak verduur, sal Van Wyk straks weer speelkans kry teen die Indiërs wat hy verlede seisoen in Makhaya Ntini se gedenkwedstryd verniel het.
As Kallis wel oorgehaal is, kan ’n nuweling in die nasionale groep, Dane Villas, as die paaltjiewagter ingespan word.
Van Wyk (33) is nietemin verseker hy is nog deel van die planne wat beraam word met die oog op die Wêreldtoernooi later vanjaar in Sri Lanka.
Van Wyk (67, 39 balle) het in die Ntini-gedenkstryd teen Indië in die plek van ’n beseerde Graeme Smith ’n SA rekord – 24 balle vir ’n vyftigtal – behaal. Hy is toe weggelaat vir die Proteas se volgende t20-wedstryd aan die begin van die seisoen teen Australië.
Sy 423 lopies as Knights-aanvangskolwer was die seisoen die naasmeeste in die plaaslike T20-reeks. “Ek was glad nie daarop uit om ’n punt te bewys nie. Ek wou net so goed moontlik vir die Knights speel,” het Van Wyk gesê.
Vir die jongste sportnuus volg Nuus24Sport op Twitter
– Sport24
