Tydskrif-lesers kies mees gehate sportlui
2011-03-16 09:04
Johannesburg – Wyle Hansie Cronjé, gewese kaptein van die Proteas, Luke Watson, Springbok-rugbyspeler, en Kevin Pietersen, Suid-Afrikaner wat tans vir Engeland krieket speel, is onder die tien sportmense van wie Suid-Afrikaners die grootste afkeer het.
Dit blyk uit ’n peiling wat die tydskrif Sports Illustrated onder sy lesers gedoen het. Die uitslag van die peiling word in die nuutste uitgawe gepubliseer.
Die lys van die toptien word in geen spesifieke volgorde gepubliseer nie en sluit ook die name in van Sean Fitzpatrick, gewese kaptein van die All Blacks, George Gregan, gewese skrumskakel van die Wallabies, en Shane Warne van Australië, op sy dag die top-draaibalbouler ter wêreld.
Oor Cronjé skryf die tydskrif hy het “ontelbare harte gebreek en ’n menigte mense teleurgestel” toe dit aan die lig gekom het dat hy by wedstrydknoeiery betrokke is.
Wat Watson betref, skryf Sports Illustrated sy gebruik van die woorde “Spingboktrui” en “braak” in een sin het aan hom die bynaam Puke Watson besorg.
Pietersen is op die lys omdat hy, volgens die lesers, Suid-Afrika sleggesê het ná sy verhuising na Engeland en omdat “niemand sy enorme ego kan verduur nie”.
Nog ’n sportman vir wie daar min liefde in Suid-Afrika is, is Clyde Rathbone, gewese kaptein van die Suid-Afrikaanse o.21-span. Toe hy na Australië uitgewyk het, het hy van homself ’n sportman gemaak wat “elke sportpersoon in Suid-Afrika per definisie verag”.
Fitzpatrick het die lys gehaal omdat hy die verpersoonliking is van die rugbywedywering tussen die Springbokke en die All Blacks.
Die ander name op die lys is dié van Sergio Motsoeneng, wat in 1999 in die Comrades-marathon gekul het deur die wedloop in ’n “aflosspan” saam met sy tweelingbroer te hardloop.
Die Aussie-skeidsregter Stuart Dickinson en die Amerikaanse bokser Floyd Mayweather jr. voltooi luidens Sports Illustrated se peiling die afkeer-lys.
Vir die jongste sportnuus volg Nuus24Sport op Twitter.
- Sport24
