Troosprys vir Proteas
2010-02-27 18:39
Ahmedabad - Die Proteas het 'n troosprys ontvang toe hul vir Indië Saterdag in die derde en laaste eendagwedstryd van die toer met 90 lopies geklop het.
Skitterende honderdtalle deur Suid-Afrika se Jacques Kallis en AB de Villiers het die Proteas op die voorvoet geplaas nadat die span 365-2 in hul kolfbeurt aangeteken het.
Vroeër het kaptein Kallis die regte besluit geneem om sy span in te stuur om te kolf nadat hy die loot gewen het.
Die kolfblad was plat en droog en het dus die draaiboulers bevoordeel. Die Proteas het hoeka vir Johan Botha en Roelof van der Merwe in hul beginspan ingesluit.
Die spoedvrate Morne Morkel en Lonwabo Tsotsobe was ook in die plekke van Charl Langeveldt en Wayne Parnell gekies.
Loots Bosman het weer sy verskyning gemaak, terwyl Alviro Petersen uitgelaat is. Bosman het ook behoorlik onder die Indiërs ingeklim, maar het sy paaltjie roekeloos na sy vyftigtal weggegooi.
Indië se kolfkanonne Sachin Tendulkar en Virender Sehwag word gerus, met Murai Vijay en Rohit Sharma wat hul skoene moes vul.
Die tuisspan het gaan kolf, maar het hul eerste paaltjies vroeg in die kolfbeurt verloor. Daarna het Vijay en V. Kholi 'n goeie vennootskap gebou, maar die SA-aanval het die Indiese kolwers laat les opsê en hul vir 275 uitgehaal.
Dale Steyn en Tsotsobe het elkeen drie paaltjies platgetrek om hul span se oorwinning te verseker.
- Nuus24