Titans moet in spoor trap
2009-12-10 09:57
Christo Buchner
Johannesburg - Die berugte kolfblad in die Paarl sal hopelik reg kan laat geskied aan ’n kragmeting tussen die twee voorste spanne in die meerdaagse SuperSport-krieketreeks.
Die wedstryd tussen die Cape Cobras en die Titans, wat vanoggend begin, kan ’n lippelek-stryd wees, maar dan sal die blad sy kant moet bring.
Gewoonlik is dié blad nie bevorderlik vir aanvallende krieket nie en lei dit meestal tot vervelige, onbesliste uitslae, óf uitslae binne enkele dae op iets wat meer aan ’n omgeploegde mielieland herinner. Dit sal werklik jammer wees as dit oor die volgende vier dae in daardie pragtige deel van die wêreld weer die geval sal wees.
Die Cobras se snelbouler Charl Langeveldt is die een speler wat weet wat dit verg om sukses op dié blad te behaal. Dit is nie ver hiervandaan nie waar hy eens in sy lewe ’n bewaarder by die Victor Verster-gevangenis was – en hy sal die Titans-kolwers wil boei.
Om die val van die muntstuk reg te voorspel, is gewoonlik ’n baie belangrike aspek van wedstryde in die Paarl. Hoe langer die wedstryd duur, hoe laer skiet die bal deur en word dit al hoe moeiliker vir die houespelers.
Daarom sal dit op die eerste dag of twee die beste vir kolfwerk wees.
Langeveldt sal goeie ondersteuning kry van Vernon Philander, wat in die jongste tyd net nie kan ophou om paaltjies te neem nie. Die Titans se toporde, met Jacques Rudolph, Gulam Bodi, Blake Snijman, die jong Pieter Malan en Heino Kuhn, sal sterk moet staan teen dié boul-tweeling van die Kapenaars. Albie Morkel, wat ná een toets vroeër vanjaar teen Australië weer in die koue is, sal ’n veelsydige vertoning wil lewer waarvan die nasionale keurders móét kennis neem.
Die besoekers se boulaanval lyk maar dunnerig, met die groentjie Tumi Masekela wat sy eerste ervaring van krieket op dié vlak kry.
Andrew Puttick en sy kolfmaats sal hom gewis in die visier hê.
* Op die Wanderers sal die Lions die momentum van hul groot sege met ’n beurt en 216 lopies oor die Titans wil behou teen die Diamond Eagles.
Minder as 13 ligapunte skei die voorloper (59.00) van die laaste span (46.42) en daarom besef al die spanne ’n sege hierdie naweek sal soos ’n aangename verrassing onder die Kersboom wees.
* Al is die Dolphins in die laaste plek, glo hulle ’n tuissege oor die Warriors op Kingsmead in Durban sal hulle weer sterk in die wedloop kry. Die voormalige Proteas-speler Garnett Kruger kan sy buiging vir die Warriors maak.
- Die Burger