Theron se 'gooie' weer onder vergrootglas
2009-11-13 16:29
Henk Steenkamp
Port Elizabeth - Rusty Theron se boulaksie het weer onder die vergrootglas gekom.
Daar was ’n tikkie drama rondom dié Warriors-naatbouler se aksie gister op St. Georgepark op die eerste dag van die SuperSport-krieketwedstryd teen die Titans.
Die Titans sal vanoggend hul eerste beurt met die telling op 326/6 hervat. Pieter Malan (115, 11x4) was die besoekers se kolfheld met ’n pragtige ankerbeurt, sy eerste honderdtal in die reeks. Hy was veral sterk aan die wegkant.
Theron se aksie het sowat twee weke gelede die ja-woord van Krieket Suid-Afrika gekry nadat hy toetse in Kaapstad ondergaan het. Die toetse het gevolg nadat hy vroeër in die seisoen deur skeidsregters vir ’n verdagte aksie uitgewys is wanneer hy sy kort aflewering boul.
Kort voor die teepouse Donderdag het die skeidsregters, Rudi Koertzen en Karl Hurter, bymekaar gekom toe Theron twee kort aflewerings ná mekaar geboul en sy aksie vir hulle na ’n gooi-aksie gelyk het.
“Die Warriors se kaptein, Davy Jacobs, is toe ingelig dat Theron se kort aflewerings na gooie lyk en dit foutballe kan wees,” het die wedstrydskeidsregter, Tiffie Barnes, gesê.
Barnes het die Warriors se afrigter, Russell Domingo, ingelig dat foutballe geroep kan word. Domingo het toe daarop gewys dat Theron se aksie ná tegniese toetse goedgekeur is.
“Ek het nie die tegniese verslag gekry wat daarop wys dat Theron sy arm nie heeltemal reguit kan maak wanneer hy die kort balle boul nie. Volgens die verslag buig hy sy arm 10 grade, wat binne die voorgeskrewe 15 grade is,” sê Barnes.
“Noudat skeidsregters bewus is van die tegniese detail van die verslag behoort hulle gemaklik met sy aksie te wees.”
Theron het die Titans se eerste paaltjie ingeoes deur Blake Snijman (24) been voor paaltjie te betrap met ’n aflewering wat laag gebly het. Dit was met die derde bal van sy eerste beurt.
Snijman en Jacques Rudolph het 52 om die eerste paaltjie bygedra. Kort ná die etenspouse is Rudolph (61, 11x4) netjies op tweede glip deur Arno Jacobs van Makhaya Ntini se boulwerk uitgevang.
Rudolph het ’n goeie beurt gespeel. Hy was van die begin daarop ingestel om die los aflewerings te straf en het pragtige dryf- en trekhoue gespeel.
Twee verdere paaltjies het die Titans op 142/4 gelaat voordat Pierre Joubert (57) hom by die ankerman, Malan, vir ’n goeie vennootskap van 136 om die vyfde paaltjie gevoeg het.
Tussen die gure weer en die breë kolwe van die Lions het die Cape Cobras se boulers gister nog ’n teleurstellende dag op Nuweland beleef, berig Altus Momberg uit Kaapstad.
Die Lions, wat die loot in dié SuperSport-stryd gewen het, het 125/2 teen uitskeityd bereik met die jong Jonathan Vandiar wat uitgeblink het met ’n indrukwekkende 70 (120 minute, 100 balle, 11x4).
Dit was nie ’n maklike kolfblad om op te speel nie, maar Vandiar het die toestande goed hanteer en al die Cobras se boulers gestraf. Stephen Cook, wat 390 in sy laaste stryd teen die Warriors gemoker het, het hom goed, maar effe stadig gesteun en sal op 31* (147 balle) voortkolf.
Die weer het egter die grootste invloed op die dag se spel gehad. Spel is drie keer gestaak weens reën, terwyl ’n nat buiteveld net ná die middagete spel ook lank ontwrig het.
Behalwe vir die wen van die loot, het bitter min gister in Pietermaritzburg vir die Diamond Eagles reg verloop, berig Johann de Jager.
Die Dolphins was al op die eerste dag van die SuperSport-stryd in beheer nadat die besoekers vir ’n skamele 178 lopies in hul eerste beurt uitgeknikker is. Ahmed Amla (34*) en Jon Kent (43*) sal vandag op 171/3 vir die tuisspan voortkolf.
- Beeld