Thami jag Boucher se toetsplek
2011-12-09 08:51
Benoni. – Vir Thami Tsolekile loop die pad terug na Suid-Afrika se toetskrieketspan deur Willowmoorepark, waar ’n nasionale uitnodigingspan van Vrydag hier in ’n oefenwedstryd met die besoekende Sri Lanka kragte meet.
Tsolekile (31) het sewe jaar gelede die laaste van sy drie toetse vir die Proteas gespeel, maar het vandeesweek gesê hy is gereed om die paaltjiewagterhandskoene by Mark Boucher oor te neem.
Tsolekile is kaptein van die tuisspan, wat oor die volgende drie dae sal probeer om die Sri Lankane se Suid-Afrikaanse safari op ’n vals noot te laat begin.
Die Proteas pak die afrigter Geoff Marsh se span volgende week op SuperSportpark in Centurion in die eerste van drie toetse.
“Destyds was my kolfwerk nie op internasionale standaard nie, maar ek het die laaste ruk baie hard daaraan gewerk en ek voel ek is nou reg om weer ’n kans te kry,” het Tsolekile aan ESPNcricinfo.com gesê.
“Ek is nou ’n veel beter en meer volwasse speler as sewe jaar gelede.”
“Ek glo ek moet naby aan die span wees, want gewoonlik staan die ou in die A-span volgende in die ry.”
Die 35-jarige Boucher se plek in die toetsspan word opnuut bevraagteken nadat dié wêreldrekordhouer onlangs in die toetsreeks teen Australië met die kolf gesukkel het.
- Intussen het Marsh Donderdag gesê die toerspan wil sy onlangse teleurstellende spelpeil teen die Proteas wreek.
Marsh-hulle, wat in April vanjaar nog die eindstryd van die Wêreldbekertoernooi gehaal het, het pas ’n toets- en eendagreeks teen Pakistan verloor en voor dit ook in reekse teen Engeland en Australië vasgeval.
Trouens, die Sri Lankane kon nie een van hul laaste 14 toetse wen nie en het in Julie verlede jaar laas ’n sege behaal.
“Ons was nie só swak as wat ons onlangse vertonings aandui nie, maar ná die Pakistan-toer is die spelers oorgehaal om te wys wat hulle werklik kan doen,” het Marsh gesê.
“Ons besef ons sal veel beter moet speel en heelparty van ons kolwers kort dringend lopies.
“As ons aan ons boulers genoeg lopies kan gee om te verdedig, kan dit ’n baie interessante reeks wees,” het Marsh gesê.
Vir die jongste sportnuus volg Nuus24Sport op Twitter.
– Sport24