Tendulkar wys jy hoef nie bal uit stadion te moker
2010-03-23 14:07
Kaapstad - Die Indiese meester Sachin Tendulkar het Maandag op sy tuisveld weer gewys dat jy nie elke bal uit die stadion uit hoef te moker om sukses in twintig20-krieket te behaal nie.
Tendulkar (71* van 48 balle, 10x4) het gister die Mumbai Indians tot ’n maklike oorwinning van 7 paaltjies oor die Kolkata Knight Riders in die Indiese Premierliga gelei.
Die oorwinning beteken dat die Indians nou op 6 ligapunte saam met verlede seisoen se finaliste, die Deccan Chargers en die Royal Challengers Bangalore bo-aan die IPL se puntelys is.
Die Knight Riders is beperk tot 155/3 in hul 20 beurte en dit was ten minste 20 lopies kort van ’n mededingende totaal.
Die Indians (156/3), met Tendulkar in volle swang, het nooit gelyk of hulle gaan sukkel in die jaagtog nie en het die wenlopies met nog 9 balle oor behaal.
Tendulkar het, net soos in sy ongelooflike beurt teen die Proteas in Gwalior verlede maand, uitstekende kriekethoue gespeel en die pas van die jaagtog uitstekend geskat.
Die lopietempo was nooit buite Tendulkar-hulle se bereik.Chris Gayle het sy terugkeer tot vanjaar se toernooi gevier met ’n fantastiese 75 van 60 balle (7x4, 2x6), maar dit was nie genoeg gewees om die Knight Riders ’n oorwinning te besorg nie.
Gayle het nou eers in Indië geland nadat hy die Windies teen Zimbabwe gelei het.
Ofskoon Gayle en Sourav Ganguly 70 lopies om die eerste paaltjie aangeteken het, het hulle nie die pap vinnig genoeg aangemaak nie.
Die eerste vennootskap het 11 beurte geduur. Gayle het in die doodsnikke ingeklim, maar daar was nie genoeg tyd om die telling by 180 te kry nie.
Owais Shah en Ganguly het Gayle albei met 31 lopies ondersteun, maar dit was uiteindelik nie genoeg nie.
- Sport24