Té min van dié span, sê Symcox
2011-12-31 09:24
Durban – Die afwesigheid van Dolphins-spelers in die Suid-Afrikaanse krieketspan is die hoofrede hoekom die Proteas so op Kingsmead sukkel.
Dít is die mening van Pat Symcox, ’n voormalige draaibouler van die Proteas.
“Daar moet onthou word dat toestande op Kingsmead baie anders is as op enige ander veld in die land.
“Daar is ’n spesifieke manier hoe jy hier moet kolf en boul. Jy moet weet wat die (boul)lengte hier is, anders gaan jy sukkel.
“Kyk maar hoe suksesvol was Suid-Afrika hier toe daar ’n hele paar Natallers in die span was soos Shaun Pollock, Andrew Hudson, Lance Klusener en ek.
“Wie was Suid-Afrika se suksesvolste kolwer in hierdie toets? Hashim Amla; en hy is ook die enigste plaaslike kolwer in die span,” het Symcox gesê.
“Ek dink nie dit was bloot toevallig nie. Die probleem is dat Dolphins-krieket deesdae só swak is dat hul spelers nie meer aanspraakmakers op plekke in die Suid-Afrikaanse span is nie.
“Vroeër jare was dit ’n geval van jy kies die spelers wat die beste by ’n spesifieke baanblad pas. Elke blad in die land was anders en as daar in die Kaap gespeel is, is voorkeur gegee aan iemand soos Denys Hobson as die draaibouler.
“Wanneer in Johannesburg gespeel is, was dit die plaaslike snelboulers wat weer die beste kans gehad het om sukses te behaal. Deesdae werk dit ongelukkig nie meer so nie.
“Ek dink dit is onsin om te beweer dat daar oor die ‘Kerstoets’ net té veel ander dinge is waaraan die spelers dink, behalwe die krieket.
“Hulle moet net leer hoe om op Kingsmead te speel. Dis al,” het Symcox gesê.
Graeme Smith, Suid-Afrika se kaptein, het ná sy span se massiewe nederlaag met 208 lopies hier – op drie na die grootste pak slae sedert hertoelating – erken daar blyk ’n probleem vir die span op Kingsmead te wees.
“Hulle (Sri Lanka) het veel beter aangepas by die stadiger baanblad en die omgekeerde swaai wat bewerkstellig is.
“Ek kan eerlikwaar nie my vinger op die probleem lê nie. Ek wens ek het ’n antwoord vir jou gehad, maar ek het nie,” het hy oor die nederlaag gesê.
Suid-Afrika het sy laaste vier toetse hier verloor en daar is diegene wat meen die “Kerstoets” moet van Kingsmead weggeneem word.
– Sport24
– Vir die jongste sportnuus volg Nuus24Sport op Twitter