Tahir ‘n 'groot hupstoot' – Smith
2011-11-08 21:53
Kaapstad – Die Proteas-kaptein Graeme Smith sê die bybreekbouler Imran Tahir is ‘n groot bate vir sy span, wat waarskynlik beteken die 22-jarige sal sy toetsdebuut Woensdag op Nuweland teen Australië maak.
“Imran is ‘n wonderlike ou om in die ronde te hê en dit is goed vir my as kaptein om die bal na hom te kan gooi,” het Smith Dinsdag gesê.
“Ons moet hom net toelaat om sy voete te vind, aangesien daar baie opwinding oor hom is, maar sy selfvertroue sal groei soos die wedstryd vorder.”
Die Proteas het nog nie ‘n toetswedstryd gespeel sedert hulle in Januarie op Nuweland gelykop gespeel het teen Indië nie. Die Aussies kom pas van ‘n toetsreeks-oorwinning in Sri Lanka en het ook verlede week ‘n vierdag-opwarmingswedstryd gespeel.
“Wanneer môre aanbreek, weet ek die ouens sal sielkundig in ‘n goeie plek en gereed om te gaan wees,” het Smith gesê.
“Australië is beter voorbereid as ons – dit is dit realiteit – en ons sou baie graag meer tyd in ons bene wou hê, so ons het soveel as moontlik gedoen om seker te maak ons kom uit en speel goeie krieket vir vyf dae. Dit is al wat ons kan beheer.”
Australië het ‘n goeie rekord in Suid-Afrika en het hul laaste twee toetsreekse hier gewen (3-0 in 2006 en 2-1 in 2009).
- Volg Nuus24Sport op Twitter
- SAPA