Tahir-bybreke 'hou sleutel tot SA sukses'
2012-01-05 09:38
Nuweland – Ke Nako, Imran!
Die tyd het vir die bybreekbouler Imran Tahir aangebreek om enige twyfel oor sy plek in die Proteas se toetsspan uit die weg te ruim deur die boul-aanslag teen Sri Lanka in die komende drie dae te lei.
Jacques Kallis en die Sri Lankaanse afrigter, Geoff Marshall, was dit na afloop van dag twee eens dat draaiboulwerk in die oorblywende dae van dié beslissende kriekettoets in Kaapstad deurslaggewend gaan wees.
Kallis (224), wat die tweede dubbele honderdtal van sy loopbaan aangeteken het, het gesê dat Tahir reeds gistermiddag ’n paar balle lekker laat draai het.
“Dit is ’n baie droë kolfblad en ek is oortuig dat daar net meer en meer hulp vir Imran sal wees.”
Tahir het sover net 9 paaltjies in sy eerste vier toetse platgetrek. Maar dié blad is die eerste een wat regtig hulp aan hom sal verleen.
Kallis het bygevoeg dat die naatboulers ook ’n bietjie hulp van die blad sal kry.
“Daar is reeds oneweredige wip, veral met die korter aflewerings.
“Ek is vol vertroue dat ons die 20 paaltjies kan plattrek om die toets te wen. Ons moet net seker maak dat ons die regte lyn handhaaf.”
Marshall glo weer Sri Lanka se kolwers sal die reeks kan red.
“Ons het glad nie goed geboul nie, maar ons het goeie kolwers. Spelers soos Mahela (Jayawardene) en Kumar (Sangakkara) is uiters ervare manne en weet hoe om hulself sielkundig voor te berei vir die drie harde dae van toetskrieket wat wag,” het die voormalige Australiese aanvangskolwer gesê.
Sangakkara en Jayawardene het al voorheen die Proteas se boulers aan flarde geslaan.
Hulle het in 2006 ’n wêreldrekord opgestel vir die hoogste vennootskap in toetskrieket teen die einste Suid-Afrika.
Hulle het 624 lopies op die SSC in Colombo ingeryg in ’n toets wat Suid-Afrika met ’n beurt verloor het.
Die twee ervare manne sal waarskynlik die kastaiings uit die vuur moet krap, maar Thilan Samaraweera en Dinesh Chandimal het in vorige toetse ook gewys dat hulle hul voor die paaltjies kan ingrawe.
– Sport24
– Vir die jongste sportnuus volg Nuus24Sport op Twitter