SuperSport-kroon soek sy baas
2012-02-09 09:02
Kaapstad. – ’n Sakrekenaar pleks van ’n krieketkolf kan moontlik die naweek die wenner van die SuperSport-reeks bepaal.
Die laaste ronde van wedstryde begin Donderdag met die Titans en die Cape Cobras kop aan kop in die wedloop om die titel. Selfs die Knights en Lions het ook nog ’n wiskundige kans.
Die Cobras (108.50 punte) is die voorloper met die Titans (107.82) minder as punt agter hulle in die tweede plek. Die Cobras pak die Lions op die Wanderers in Johannesburg, terwyl die Titans tuis teen die Dolphins in Centurion speel.
Die wedstryde gaan nie net oor seges nie, maar daar sal ook ’n gejaag na bonuspunte wees.
En dus waar die sakrekenaars ingespan sal word. Spanne kry bonuspunte tydens die eerste 100 boulbeurte van elke eerste beurt.
Die boulspan kry ’n bonuspunt wanneer hy die 3de, 5de, 7de en 9de paaltjies plattrek en kan ’n maksimum van vier boulpunte verdien.
Die kolfspan kry sy eerste bonuspunt wanneer hy 150 bereik en daarna kry hy ’n bykomende 0.02 van ’n punt vir elke lopie in die eerste 100 boulbeurte.
Die wenspan kry ook 10 punte vir ’n sege.
Die Cobras is erg verswak met JP Duminy, Richard Levi, Justin Ontong en Robin Peterson wat môre saam met die Proteas se t20-groep na Nieu-Seeland vertrek.
Die Kapenaars kan egter verras deur die Bolandse bybreekbouler Carl Raubenheimer te kies.
*Matthew Maynard, afrigter van die Titans, het Woensdag gesê dit is vir situasies soos dié dat spelers leef, skryf Christo Buchner.
“Dit is wonderlike situasie wat hom hierdie naweek kan afspeel met ons, die Cobras en die Knights wat nog almal kan seëvier. Ek het dit vir my spelers duidelik gemaak dat ons moet fokus op ons eie vertoning en nie bekommer oor wat elders gebeur nie,” het Maynard gesê.
*Die Knights behoort nie baie te sukkel om die Warriors onder te kry nie, maar of hulle dit goed genoeg sal doen om die kampioen te word, is die groot uitdaging, skryf Henk Steenkamp.
Die tuisspan is erg uitgedun en sal op die kolf van die deurwinterde Ashwell Prince moet staatmaak om ’n positiewe uitslag te bewerkstellig.
Prince sal die geleentheid wil aangryp om die aandag van die nasionale keurders op hom te rig.
Vir die jongste sportnuus volg Nuus24Sport op Twitter.
– Sport24