‘Sultan’ Steyn praat reeds met legendes
2010-02-11 09:00
Altus Momberg
Nagpur - Sultan van die Subkontinent.
Dít is die titel waarmee die snelbouler Dale Steyn kan spog nadat hy 10 paaltjies in Suid-Afrika se beurtsege hier oor Indië laat spat het.
Van al die snelboulers in wêreldkrieket wat minstens 50 paaltjies op die subkontinent (Indië, Pakistan, Bangladesj en Sri Lanka) geneem het, het Steyn die laagste gemiddelde (19.66 lopies per paaltjie) en die beste treftempo (32.1 balle per paaltjie).
Die Wes-Indiese blits van die vyftiger- en sestigerjare Wes Hall is tweede op die lys. Dan kom legendes soos Waqar Younis,
Imran Khan en Richard Hadlee.
Maar dis veral in Indië waar Steyn met sy giftige mengsel van ortodokse en omgekeerde swaai op sy gevaarlikste is.
Die Phalaborwa-sneltrein het reeds 23 paaltjies in 4 toetse in dié land laat kantel en sy blote teenwoordigheid stem die Indiese kolwers tot onrus.
Steyn word ook deur voormalige en huidige Indiese spelers opgehemel op al wat ’n TV-nuuskanaal is hier in Indië.
Steyn kan ook met 5 paaltjies in die volgende toets hom by ’n uitgelese groepie in toetskrieket aansluit.
Hy het ná 37 toetse 195 toetspaaltjies agter sy naam en kort dus nog vyf om die 200-kerf te bereik.
Die vinnigste 200 toetspaaltjies nog?
Dit staan agter die naam van die Australiese bybreekbouler Clarrie Grimmett, wat in 36 toetse die 200-tal in 1936 bereik het. Dennis Lillee en Waqar het dit in 38 toetse gedoen.
Corrie van Zyl, die waarnemende afrigter van die Proteas, weier om Steyn met vorige SA boulers te vergelyk.
“Dale is nou die beste SA bouler en dis om vanselfsprekende redes die geval.
“Om teen daardie spoed te boul, die bal te swaai en dan ook omgekeerde swaai te bewerkstellig soos in die toets in Nagpur, maak hom baie spesiaal.”
Intussen lyk dit nie of die Proteas aan die toetsspan gaan torring wat Indië van Sondag af in Kolkata in die tweede toets pak nie.
Van Zyl is op Woensdag se nuuskonferensie gevra of hy bekommerd is oor die sukkelende JP Duminy se gemoedstoestand.
“Ek wil nog met JP praat voor ek daardie vraag kan beantwoord, maar ek het geen twyfel dat hy goed genoeg is om sy probleme te oorkom nie,” het Van Zyl gesê.
- Die Burger