Suid-Afrika vorder stadig tot by 418
2009-12-17 16:20
Centurion - Paul Collingwood het die vangskote ingeryg terwyl Suid-Afrika gesukkel het om lopies te kry op die tweede dag van die eerste toets tussen Suid-Afrika en Engeland. Suid-Afrika het 330/6 aangeteken teen middagete en albei oornagkolwers verloor terwyl hulle net 68 meer lopies teen middagete kon aanteken.
Jacques Kallis het net agt lopies by sy oornagtelling van 112 gevoeg voor hy uitgevang is in die glippe vanaf `n bal van James Anderson. Collingwood het die vangwerk gedoen vir sy derde vangskoot van die wedstryd. JP Duminy het 56 lopies by sy oornagtelling gevoeg voor hy`n vierde vangskoot aan Collingwood gebied het vanaf die boulwerk van Graeme Swann.
Alistair Cook het Mark Boucher op 29 lopies uitgevang van `n bal van Swann wat na binne gesny het en die binnerand van die kolf gevang het.
Boucher was reeds gelukkig genoeg om op 25 `n lewenskans te kry toe Graham Onions `n vangskoot gemis het.
Engeland het ook gedink hulle het die sewende paaltjie drie balle voor middagete toe Morné Morkel been voor paaltjie uitgegee is maar Steve Davis het die besluit omgedraai na die kykweer gewys het dat die bal oor die paaltjies sou trek.
`n Goeie bal van Onions het die binnerand gevang tot op die paaltjies van Paul Harris terwyl Swann van De Wet ontslae geraak het om sy vyfde paaltjie te eis. Suid-Afrika se laaste paaltjie het geval met hul telling op 418 na 153.2 boulbeurte.
- Sport24