Strauss ‘min gepla’

2009-11-03 10:39

JOHANN DE JAGER

Andrew Strauss, krieketkaptein van Engeland, is oorgehaal vir die uitjouery wat in die komende reekse teen die Proteas op hom en sy toerspan wag.

Die hardloper-sage met sy Suid-Afrikaanse eweknie, Graeme­ Smith, toe Engeland die Proteas verlede maand in die toernooi om die Kampioene-trofee uitgeskakel het, sal die vet in die vuur in die spanne se herontmoeting wees.

Strauss het geweier dat Smith ’n hardloper gebruik toe hy teen die einde van sy kolfbeurt deur erge krampe lamgelê is.

Engeland het, ondanks Smith se honderdtal, die wedstryd gewen, wat slegs sy vierde sege in 19 eendagwedstryde hier oor die Proteas was.

Strauss sê hy het ’n skoon gewete oor wat gebeur het.

“Maar ek is seker daar sal oor die volgende paar maande hier en daar ’n aanmerking daaroor wees. Dis nie iets wat wat my sal pla nie.”

Op ’n vraag of die sage ook die omgekrapte Smith en sy spanmaats se aandag op die veld kan aflei, het hy gesê hulle hoop so. “Ek dink persoonlik nie dit gaan ’n groot kwessie tussen die spanne wees nie.

“Ek hoop nie dit dryf nou ’n groot wig tussen die spanne in nie.”

Die gort is gewoonlik gaar wanneer Suid-Afrika en Engeland kragte meet en die toer het volgens Strauss nie nog vet in die vuur of bykomende opbou nodig nie.

Hulle hoop om die toer goed te begin om die toetsreeks later met momentum tegemoet te kan stap.

“Ons moet so gou moontlik aanpas voor die eendagreeks. Die een ding wat ons nie wil hê nie, is om dit nou rustig te neem en eensklaps met 0-3 agter te wees in die eendagreeks nie. As ons die eendagreeks wen, sal ons goeie momentum vir die toetse hê.”

Strauss skroom nie om te sê dat ’n groter uitdaging vir Engeland voorlê as die reeks om die As teen Australië nie.

“Ons speel teen Suid-Afrika, die voorste span ter wêreld in albei kodes, op sy tuisveld.

“Dit is so taai soos kan kom. Dit sal ’n reuse-prestasie wees as ons wen.

“Dit is ook ’n goeie geleentheid vir ons om te sien waar ons ons bevind.”

Strauss is baie bly om Kevin Pietersen terug te verwelkom, maar hulle sal hom nie oorweeg tensy hy ten volle van sy hakskeenbesering herstel het nie. “Ek is baie opgewonde om hom terug te hê.

“Ons het sy gehalte gemis, ons het sy invloed gemis. Ek stem saam hy gaan baie vars en uitgehonger wees.”

Pietersen, wat in Suid-Afrika gebore is, sal hom oor die naweek by die toergroep aansluit.

Hy het al drie honderdtalle hier in kitsstryde teen die Proteas aangeteken en Engeland hoop hy sal slaggereed wees wanneer die kitsreeks begin.

- Beeld