Steyn die Aussie-pyn
2011-11-19 07:07
Wanderers – Nie nét het Suid-Afrika Vrydag wéér uit ’n vroeë krieketgraf opgestaan nie – sy sluimerende paaltjievraat het boonop óók nou ontwaak.
Dale Steyn, die Protea-blitsbouler, het Australië Vrydag gewaarsku dat hy “nog lank nie die beste gesien het nie” van Imran Tahir, saam met wie hy vroeër die tuisspan se wenkans in die tweede toets op die Wanderers eiehandig lewend gehou het.
Steyn (4/64) en Tahir (3/55) het tussen hulle sewe van die Aussies se 10 eerstebeurt-paaltjies laat kantel om die besoekers vir 296 uit te haal – ’n voorsprong van “net” 30 lopies, nadat die Proteas eergister met ’n ewe beskeie 266 tevrede moes wees.
En net soos in die Suid-Afrikaners se eerste poging met die kolf, was ’n merkwaardige kolf-ineenstorting te blameer vir die besoekers se geswoeg.
Die toerspan het ál 10 sy paaltjies vir 122 lopies verloor – en die laaste ses daarvan vir net 68 – nadat hy vroeër haas onstuitbaar gelyk het met sy telling op ’n yslike 174/0.
In die oggendskof het hul aanvangspaar, Shane Watson (88) en Phil Hughes (88), na hartelus ingeklim onder Steyn en sy boulmaats – en teen die middagete was die Proteas se kanse om ’n eerste tuisreeks teen die Aussies te wen sedert hertoelating, skynbaar daarmee heen.
“Dit was wéér ’n ongelooflike terugvegpoging, want toe ons van die veld stap vir die middagete was ons in baie groot moeilikheid,” het Steyn gesê.
“Graeme (Smith, die Protea-kaptein) het ons bymekaar geroep en laat weet wat hy van ons boulvertoning dink.
“Daarna was ons strate beter – en hoewel dit bitter warm was en daar môreoggend (vanoggend) ’n paar seer lywe sal wees, glo ek ons is nou weer in beheer van dié toets.”
Eers het Morné Morkel (1/62) en Vernon Philander (1/47) die lopiekrane ordentlik toegedraai, waarna Steyn en Tahir die Aussie-kolwers se ongeduld uitgebuit het.
Terwyl die Phalaborwa Express toetsslagoffers nommer 245 tot 248 met sy sywaartse beweging en vaart geëis het, moes Tahir wag tot laat in die aandskof voordat hy sy eerste paaltjie platgetrek het deur Brad Haddin (16) bvp te betrap.
Dié Pakistani van geboorte, wat verlede week in Kaapstad ’n teleurstellende toetsbuiging in die eerste toets gemaak het, het daarna ook die stertkolwers Peter Siddle (0) en Nathan Lyon (2) uitgehaal.
“Imran was fantasties, want hy moes lank wag vir daardie eerste paaltjie nadat hy skaars boulkans gekry het in Kaapstad,” het Steyn gesê.
“Ek kan nie wag om te sien wat hy in die (Aussies se) tweede beurt gaan doen nie.”
– Sport24
– Bly op hoogte van al die jongste sportnuus deur Nuus24Sport op Twitter te volg