Sri Lanka op hete kole
2012-01-03 08:46
Kaapstad – Die Sri Lankaanse krieketspan is steeds in die wolke ná sy geskiedkundige sege in Durban, maar beserings dreig om sy Suid-Afrikaanse partytjie kort te knip.
Die besoekers se paaltjiewagter, Dinesh Chandimal, het vyftigtalle in albei beurte van die tweede toets op Kingsmead in Durban gemoker. Hy sukkel egter met ’n sleg gekneusde regterelmboog.
Hoewel sy kaptein, Tillakaratne Dilshan, gesê het dat hy Maandag beter gevoel het as Sondag, sal hulle eers vandag voor die derde toets teen die Proteas oor sy beskikbaarheid besluit.
Die aggressiewe naatbouler Dilhara Fernando se knie lol en as hy nie kan speel nie, sal Dhammika Prasad in sy eerste wedstryd van die toer speel.
Chandimal sal ’n reuse-verlies wees. Hy het in Durban amper ses uur gekolf – in sy debuut – en gewys dat hy een Sri Lankaan is wat in Suid-Afrikaanse toestande op sy gemak is.
Sri Lanka se sege in Durban was sy eerste toetsoorwinningtot nog toe in Suid-Afrika.
Dilshan het ook gesê sy span skrik nie vir die Proteas se onlangse rekord hier op Nuweland of die terugkeer van Vernon Philander nie.
“Ek weet hulle vaar goed hier, maar ons het in die tweede toets gewys dat ons in enige toestande kan speel. Ons loop oor van selfvertroue. “Die kolfblad lyk ook na een waarop kolwers én boulers kan goed vaar.”
Oor Philander, wat 24 paaltjies in sy eerste drie toetse laat kantel het voor ’n kniebesering hom uit die Durban-toets gehou het, was Dilshan ook louerig.
“Hy het baie goed geboul in die eerste toets, maar die toestande hier verskil baie en ons het ook ’n paar planne uitgewerk om hom hok te slaan.”
Daar is duidelik ’n nuwe selfvertroue by Sri Lanka te bespeur. “Voor die reeks het almal gesê ons is nie goed genoeg nie. Ons het in die laaste toets gewys ons kán wen,” het Dilshan gesê.
Vir die jongste sportnuus volg Nuus24Sport op Twitter
– Sport24