Sri Lanka laat Indië verder les opsê
2010-07-28 13:48
Johannesburg - Sri Lanka staan op die rand van ’n oortuigende reekssege oor Indië nadat Kumar Sangakkara en Mahela Jayawardene dié krieketspan se lopiefees Dinsdag, op die tweede dag van die tweede toets in Colombo, voortgesit het.
Danksy hul vennootskap van 193 lopies om die derde paaltjie, kon die tuisspan sy eerste beurt op ’n tamaai 642/4 sluit.
Indië was teen die uitskeityd op 95/0, steeds 348 lopies duskant ’n vernederende opvolgbeurt – iets wat hy nie kon afweer nie in sy loesing met 10 paaltjies in verlede week se eerste toets in Galle.
Sangakkara (219 lopies, 335 balle, 29x4) en Jayawardene (174, 244 b, 20x4, 1x6) het die besoekers se flenter-boulers verder afgemaai nadat hulle die beurt gisteroggend op 312/2 hervat het.
Dié twee hou ook die rekord vir die grootste toetsvennootskap tot nog toe – 624 wat hulle vier jaar gelede op die einste veld van die Sinhalese-sportklub teen Suid-Afrika opgestapel het.
Die Sri Lankaanse kaptein het sy sewende dubbele honderdtal kort voor die middagete behaal.
Hy is nou, ná die legendariese Don Bradman met 12 en Brian Lara se 9, die kolwer wat die meeste keer nog die 200-kerf kon verbysteek.
Sy marathon-beurt van langer as sewe uur is uiteindelik beëindig toe hy op glip deur Rahul Dravid uitgevang is van die boulwerk van die deeltydse draaier Virender Sehwag (1/71).
Jayawardene het Harbhajan Singh (1/147) se eerste slagoffer in die reeks van drie toetse geword, maar eers nadat hy en Thilan Samaraweera (76*, 121 b, 8x4) ’n verdere 176 lopies om die vierde paaltjie gemoker het.
Sy tiende honderdtal op die SSC is nou ook die meeste deur ’n kolwer op dieselfde veld, nadat hy gister die einste Bradman se nege op die MCG in Melbourne verbygesteek het.
Vir Indië was Sehwag sy aanvallende self.
Hy sal vanoggend op 64* (63 b, 12x4) voortkolf saam met ’n veel meer waaksame en versigtiger Murali Vijay (22*, 50 b, 4x4).
Bly op hoogte van al die jongste sportnuus deur Nuus24Sport op Twitter te volg.
- Sport24