Spanwerk Proteas se geheim vir sukses
2012-01-07 10:42
Nuweland – Suid-Afrika het Australië vroeër dié somer vir net 47 uitgehaal, maar Graeme Smith glo die Proteas se boulvertoning hier in die toetssege oor Sri Lanka was die beste van die seisoen.
“Ek dink hulle het uitstekend as ’n eenheid geboul – elke bouler was op sy beste.
“Ek dink dis die eerste keer dié seisoen dat dit gebeur het. In die ander toetse het een of twee ouens uitstekend geboul en ’n klomp paaltjies geneem. Maar in dié toets het elkeen sy deel bygedra en was dit ’n goeie spanpoging,” het Smith na afloop van die toets gesê.
As die Suid-Afrikaanse kaptein gelukkig was ná die reeksoorwinning, moes Tillakaratne Dilshan, sy Sri Lankaanse eweknie, behoorlik bontstaan om te verduidelik waarom hulle só swak gevaar het hier ná die oortuigende sege in Durban.
“Ons het eenvoudig nie goed genoeg gekolf of geboul nie. Suid-Afrika het hard terugbaklei ná Durban, maar ons het nie die nodige veggees getoon om die reeks te red nie.
“Ons het die toets in die eerste beurt reeds verloor.
“Jy kan nie van 149/2 na 239 almal uit steier nie. Nie op dié kolfblad nie. Ons moes minstens 450 lopies aangeteken het,” het Dilshan gesê.
Hy het egter ook die positiewe aspekte van die reeks uitgelig.
“Almal het ons voor die toer afgeskryf, maar ons het gewys ons kan ’n toets weg van die huis af wen.
“Ons het ook die kritici verkeerd bewys wat gesê het ons kan nie 20 paaltjies in ’n toets neem sonder Muttiah Muralitharan nie,” het Dilshan bygevoeg.
Dilshan het sy spanmaats uitgedaag.
“Dis een ding om te praat oor die dinge wat ons moet doen om te wen.
“Dis nou hoogtyd dat ons dié dinge begin dóén.”
Volg Nuus24 op Twitter