‘Só kan SA opvolger vir Kallis kry’
2011-12-08 09:54
Kaapstad. – Suid-Afrikaanse krieket se kans om die volgende Jacques Kallis of Shaun Pollock te ontwikkel, het vanjaar ’n groot hupstoot gekry.
Die besluit van Krieket Suid-Afrika (KSA) om die plaaslike Eendagbeker-reeks so na as moontlik op internasionale eendagkrieket te skoei, het reeds vrugte afgewerp en gaan die spel in die land beslis in die toekoms ook help.
Justin Kemp, die Cape Cobras se ervare kaptein en ’n voormalige lid van die Proteas se eendagspan, glo dat ’n mens reeds kan sien hoe die gehalte van die krieket in vanjaar se reeks verbeter het.
“Ons het klaar gesien hoe kolwers meer berekend kolf en hul beurte bou, pleks van verlede jaar se meer gejaagde en minder deurdagte krieket,” het Kemp gesê.
“Dit is egter die impak wat die nuwe formaat op die ontwikkeling van veral veelsydige spelers het wat ons krieket gaan help,” meen Kemp.
Kemp se Cobras speel Vrydag in die eindstryd van die Eendagbeker-reeks hier op Nuweland teen die Warriors, net ’n jaar nadat die Kapenaars nie eens die halfeindronde van die 40 boulbeurt-reeks kon haal nie. “Ek glo beslis dat die nuwe formaat ’n rol gespeel het in die sukses wat ons behaal het. Dit is geen geheim nie dat ek glad nie gehou het van verlede jaar se formaat nie waarvolgens spanne 13 spelers kon kies en plaasvervangers kon inspan.”
Dié seisoen bestaan elke span weer uit 11 spelers en word wedstryde oor 50 boulbeurte per span beslis. Kemp glo dat die vorige formaat die rol van veelsydige spelers “ondermyn” het, omdat spanne bykomende spesialiste kon kies: “Dit maak sin om volgens dieselfde reëls as dié in internasionale eendagkrieket te speel. Dis tog die doel om jonger spelers voor te berei vir internasionale krieket.”
Sy veelsydige spelers is een van die Kaapse span se troefkaarte, met spelers soos Kemp, Kallis, Vernon Philander, Rory Kleinveldt, Robin Peterson en selfs Justin Ontong in sy geledere.
Kemp sê die reeks help egter nie net veelsydige spelers nie: “Ons het reeds gesien hoe verskeie jong kolwers ontwikkel het. Manne soos Dean Elgar en Reeza Hendricks van die Knights en Jon-Jon Smuts en Colin Ingram van die Warriors het al ’n hele paar indrukwekkende beurte gespeel wat hul spanne tot seges gehelp het,” het hy gesê.
Vir die jongste sportnuus volg Nuus24Sport op Twitter.
– Sport24