Smith slaggereed vir Aussie-uitdaging
2012-10-29 16:30
Sydney – Die Proteas se toetskaptein, Graeme Smith, dink Suid-Afrika se reeksoorwinning in Australië vier jaar gelede was 'n belangrike stap vir die span om die voorste toetsspan te word.
Die 2-1 reeksoorwinning in 2008/2009 was die Proteas se eerste reeksoorwinning in Australië in nege probeerslae.
“Dit is lekker om hier te wees en te weet dat jy vier jaar terug hier al gewen het, dit help definitief met die selfvertroue,” het Smith Maandag tydens ‘n mediakonferensie gesê.
“Ek dink dat die span se prestasies wat hulle die afgelope vier jaar behaal het, insluitend die onlangse oorwinning teen Engeland, beteken dat ons hier aankom met die wete dat ons goed kan doen.”
Die Proteas het Engeland in Augustus 2-0 in ‘n toetsreeks verslaan om die wêreld se voorste toetsspan te word.
“Ons verstaan dat dit ‘n groot uitdaging is om na Australië te kom en hier te wen en ons besef dat daar ‘n paar onbekende hindernisse op ons pad gaan wees.”
“Ons is baie gefokus op die onmiddellike uitdaging en ons glo dat as ons hier goed doen, dit ‘n kans sal wees om die voorste toetsspan te bly.”
Tydens die Proteas se vorige reeksoorwinning in Australië was Mickey Arthur die afrigter. Arthur is egter nou Australië se afrigter en sal ‘n sleutelrol speel as hulle die Proteas wil klop.
“Die Mickey-faktor is iets waarmee ons al voorheen te doen gehad het, so dit is nie iets wat ons laat stres nie.”
“Ek en hy kom nog goed oor die weg en ek het ‘n paar weke gelede met hom gesels toe hy my al Australië se geheime vertel het,” het Smith gespot.
Die eerste van die drie toetse begin op 9 November by die Brisbane-krieketveld, oftewel die Gabba.
Vir die jongste sportnuus volg Nuus24Sport op Twitter
- Reuters
