Smith lei kolfaanslag op hondmak-blad
2010-06-19 09:08
Die Burger
Kaapstad - Die tweede kriekettoets tussen Suid-Afrika en die Wes-Indiese Eilande het gister in St. Kitts begin net waar die eerste toets Sondag opgehou het – met Suid-Afrika in totale beheer van sake.
Die Proteas het eerste gekolf op ’n baie mak kolfblad en het met die druktyd,’n halfuur voor tee, 173/1 gehad. Graeme Smith (79*) en Hashim Amla (29*) was toe voor die penne.
Smith en Alviro Petersen het die Proteas ’n goeie begin gegee en hul vennootskap van 99 was die perfekte grondslag.Smith het ná middagete voortgekolf, maar Amla was effe gelukkig toe Chris Gayle hom op 18 van Kemar Roach se boulwerk af laat val het.
Die gevoel ná die oggendsessie was dat die blad een van daardie is wat gereeld deur die boulers gevloek gaan word terwyl hulle terugloop na hul boulmerkies. Daar was amper geen hulp nie en dit sal bars gaan vir een span om 20 paaltjies te neem.
Dit was gister voor teetyd alweer afdraande vir die Windies en die Proteas-kolwers het baljaar in dié kolf-vriendelike toestande. Dit was eergister ook met die Windies se spankeuse duidelik dat hulle al hul eiers in een mandjie gesit het.
Hulle het gehoop om die loot te wen, ’n reuse-telling op te stapel en dan die Proteas onder druk te plaas met hul draaiboulers. Die oomblik toe Smith die loot gewen het en besluit het om eerste te kolf, was die Windies in die moeilikheid.
Toe Sulieman Benn, die linksdraaier, sy verskyning in die 6de beurt van die dag maak, was dit duidelik hóé diep die tuisspan in die pekel was. Soos in die eerste toets in Port of Spain het die Windies se naatboulers geen deurdringingsvermoë gewys nie en al die verantwoordelikheid is op die draaiers se skouers geplaas.
Die snelbouler Roach het die groentjie Nelon Pascal vervang, maar het ’n hele paar foutballe afgestuur.Die leë pawiljoene om die bitter klein veld was nog ’n bewys van waar Windies-krieket hom tans bevind
Bly op hoogte van al die jongste sportnuus deur Nuus24Sport op Twitter te volg.
- Die Burger