Smith kom Strauss met steekhou by
2010-01-18 08:12
Johannesburg - Graeme Smith glo die rede waarom Engeland die vierde en laaste kriekettoets gister hier op die Wanderers teen Suid-Afrika verloor het, is omdat hy te veel tyd en energie spandeer het aan die omstredenheid van die verwysingstelsel.
“Hulle het fokus verloor tydens die toets en nie gekonsentreer op dit wat hulle moes nie,” het die Suid-Afrikaanse kaptein gesê nadat sy span die beslissende toets met ’n beurt en 74 lopies gewen en die reeks gelykop (1-1) laat eindig het.
Sy Engelse eweknie, Andrew Strauss, stem nie saam nie.
“Dit was glad nie die rede hoekom ons verloor het nie.
“Ons het die toets al sommer op die eerste oggend verloor toe ons vier paaltjies in die eerste uur se spel prysgegee het.
“Ons was al sommer vanaf die eerste aflewering van die toets op die agtervoet toe ek uit is.
“Ons kon net nooit daarna herstel nie,” sê hy.
“Hierdie blad was ook gemaak vir (Dale) Steyn en (Morné) Morkel om op te boul,” sê hy van die twee Suid-Afrikaanse aanvangsboulers wat die toekenning as speler van die wedstryd gedeel het.
“Ons het in hierdie toets glad nie aan die verwagtinge voldoen nie en dit was eindelik drie en ’n halwe baie frustrerende dae.”
Strauss gee ook toe dat Suid-Afrika uitstekend gespeel het en hulle net geen kans gegun het om te probeer terugkom in die toets nie.
Smith sê sy span kon die reeks net sowel met 3-1 gewen het, met verwysing na die toetse in Centurion en Nuweland waar Suid-Afrika net nie kon afrond nie en in albei gevalle slegs een paaltjie nodig gehad het vir ’n sege.
“Die werklikheid is dat ons twee keer nie die uitklophou kon plant nie. Ek het egter nie ’n gevoel dat ons verontreg is deur nie die reeks te wen nie.
“Dit was ’n uitstekende reeks wat baie mededingend was en dit is die wonderlike ding van sport – om in ’n tweestryd soos dié met die Engelse te kon deel,” sê Smith.
Hy is ook in sy skik met hoe die boulers in die vierde toets vertoon het. “Ons het aggressief geboul en met groot deurdringingsvermoë.
“Die nuwelinge, Wayne Parnell en Ryan McLaren, het ook goed ingeskakel en die toekoms lyk goed,” sê die SA kaptein.
In Steyn en Morkel het Suid-Afrika ook nou ’n kombinasie met die nuwe bal wat diep spore kan trap.
Smith was vol lof vir die toetsblad wat voorberei is deur die veldopsigter, Chris Scott, wat Saterdag verjaar het. “Dit was lekker om op ’n blad te speel wat iets vir almal gebied het.”
- Die Burger