Smith-hulle ís bestendig (vrot)
2011-12-29 07:42
Kingsmead – Niemand kan die Suid-Afrikaanse krieketspan van ‘n gebrek aan bestendigheid beskuldig nie, want ná die Proteas se droewige kolfvertoning in hul eerste beurt van die tweede toets teen Sri Lanka was Graeme Smith se span gister ewe vrot met die bal én in die veld.
Die besoekers was teen uitskeityd met hul telling op 256/7 reeds ’n tamaai 426 lopies voor, danksy Kumar Sangakkara se 28ste toetshonderdtal – sy derde teen die Suid-Afrikaners.
Die eilandmanne het skaars 24 uur vroeër korte mette gemaak van die hoogaangeskrewe kolflys van die Proteas en die Suid-Afrikaners vir net 168 uitgeknikker.
Sangakkara (108 lopies, 190 balle, 13x4) kon voor dié beurt tellings van net 1, 2 en 0 in die reeks bymekaarskraap, maar gister is sy durf net deur sy emmers vol geduld oortref in bewolkte toestande wat veronderstel was om die tuisspan se blitstrio – Dale Steyn, Morné Morkel en Marchant de Lange – soos ’n handskoen te pas.
Vennootskappe van 94 en 104 lopies om die vierde en sesde paaltjies saam met onderskeidelik Thilan Samaraweera en Dinesh Chandimal het enige hoop wat die Proteas gekoester het op ’n merkwaardige terugvegpoging nou finaal nek omgedraai.
Tog kon dinge vandag veel anders daar uitgesien het. Sangakkara (met sy telling op 3) is van net die vierde aflewering van die dag ’n lewe gegun toe ’n misverstand tussen Smith en Mark Boucher tot ’n verbroude vangkans in die glippe gelei het van die boulwerk van Morné Morkel af.
Minder as vyf uur later was dié 34–jarige veteraan wél terug in die kleedkamer, maar eers nadat hy sy span binne bereik gebring het van ’n eerste toetssege op Suid-Afrikaanse bodem en die kans om sake aanstaande week in Kaapstad ook om die reekslouere uit te spook.
Morkel (1/43) het die eerste deurbraak bewerkstellig toe Tharanga Paranavitana (9, 22b, 2x4) deur Ashwell Prince in die glippe uitgevang is, waarna De Lange (1/45) kort daarna sy agtste slagoffer van die wedstryd geëis het deur vir Mahela Jayawardene (14, 27b, 2x2) b.v.p. te betrap.
Samaraweera (43, 64b, 5x4) en Chandimal (54, 92b, 7x4) het saam met Sangakkara vasgeskop voor en ná die goedkoop verlies van Angelo Mathews (3, 6b).
Steyn (3/54) het albei laasgenoemde kolwers uitgehaal voordat Sangakkara ook die aftog moes blaas toe hy op halfby uitgevang is van die boulwerk van Imran Tahir (2/64).
Vir die tuisspan om die onwaarskynlike te vermag en sy eerste reekssege in meer as drie jaar reeds hier te beklink, sal hy in sy tweede beurt feitlik elke kolfrekord denkbaar moet verpletter.
– Vir die jongste sportnuus volg Nuus24Sport op Twitter
– Sport24