Smith fiks vir toetsreeks teen Kiwi's

2012-12-11 08:13

Kaapstad – Die Proteas se kaptein, Graeme Smith, behoort fiks te wees vir die opkomende toetsreeks teen Nieu-Seeland nadat hy 'n hou teen die elmboog gekry het.

Smith het dié besering opgedoen terwyl hy in die nette geoefen het vir die Cape Cobras se Eendagbeker-halfeindstryd teen die Titans en is gevolglik uit Sondag se kragmeting onttrek.

Die Cobras het die wedstryd met drie paaltjies gewen en kom Vrydag in die eindstryd teen die Highveld Lions in Johannesburg te staan.

Smith sal waarskynlik nie in die t20-reeks, wat uit drie kragmetings bestaan en op 21 Desember begin, speel nie omdat hy nie deel van Suid-Afrika se onlangse t20-span is nie.

Die toetsreeks teen Nieu-Seeland begin op 2 Januarie op Nuweland.

Intussen herstel Jacques Kallis goed van die dyspierbesering wat hy in Australië opgedoen het en die verwagting is dat hy fiks sal wees om in die toetse te speel.

Vir die jongste sportnuus volg Nuus24Sport op Twitter.

– Sport24