Slagter van Nagpur
2010-02-09 10:17
Altus Momberg
Nagpur - Dale Steyn se blitzkrieg wat Indië gister planke toe gestuur het, was die gevolg van die bal wat by sy naat oopgebars het en toe met ’n nuwe vervang is; én Corrie van Zyl se vermaning dat die Suid-Afrikaanse boulers nie hul greep op die toets durf verslap nie.
Steyn, wat eers sewe paaltjies in Indië se eerste beurt laat kantel het en toe nog een in die Indiërs se opvolgbeurt geneem het, sê die “nuwe” bal het hom gewis gehelp om meer omgekeerde swaai met sy aflewerings te kry.
Dit was ná die teepouse dat Steyn as die Slagter van Nagpur in die eerste kriekettoets na vore getree het met Indië wat sy laaste 6 paaltjies in net 37 minute kwyt was.
Vir die Proteas wink ’n sege met twee dae se spel oor en Indië wat nog 259 lopies in sy opvolgbeurt moet aanteken om die besoekers weer te laat kolf. Met twee Indiese paaltjies reeds plat is dit omtrent net Sachin Tendulkar wat tussen die Proteas en ’n oorwinning staan.
Steyn het ná die dag se spel gesê Van Zyl, die tussentydse afrigter wat voorverlede week by Mickey Arthur oorgeneem het, het die boulers laat verstaan dat hul vertoning in die middagsessie nie goed genoeg was nie.
“Ons was voor middagete goed in beheer van sake en het in elke skof van die toets tot dusver die basiese dinge reg gedoen. Dit was niks ernstigs van Corrie se kant af nie. Hy het ons bloot laat verstaan dat die periode ná tee die gang van die toets sal bepaal.
“Hy het ons ook vir die laaste twee uur gemotiveer nadat ons reeds vier uur lank in die son geswoeg het,” sê Steyn.
Die Proteas was ook “gelukkig” dat die bal waarmee hulle geboul het ná 56 beurte oopgebars en die skeidsregters twee beurte voor die teepouse besluit het om dit te vervang.
Met die tweede bal was daar beslis meer omgekeerde swaai en Steyn het dit benut.
Sy tweestryd met die Indiese legende Sachin Tendulkar was een van die hoogtepunte van die dag en Steyn het erken dat hy Tendulkar se paaltjie nog lank sal onthou.
“Ja, dit het baie beteken. Syne én die een (van Murali Vijay) net voor hom. Ek het ’n plan gehad en dit het uitstekend gewerk.
Vir sulke paaltjies werk jy. Jy werk hard en lank aan ’n plan en wanneer dit werk, is dit fantasties.
“Dis iets waaraan ons baie hard in die nette gewerk het. Dit het alles begin in die toets op die Wanderers toe ek Ian Bell geboul het. Dis waar ek besef het dat al die harde werk in die nette vrugte afgewerp het.”
AB de Villiers het ná die teepouse as paaltjiewagter diens gedoen, met Mark Boucher wat met ’n rugbesering gesukkel het.
“Hy het vir ’n skandering gegaan, maar die besering is nie ernstig nie en hy behoort reg te wees vir die tweede toets,” het die span se woordvoerder gesê.
- Die Burger