Slag tref Proteas-bouler
2012-01-13 14:45
Johannesburg – Die naatbouler Rory Kleinveldt sal weens 'n geskeurde bobeenspier die res van die Proteas se eendagreeks teen Sri Lanka misloop.
Krieket Suid-Afrika het Vrydag in 'n verklaring gesê Kleinveldt het sy linker bobeenspier geskeur en sal vir tot ses weke buite aksie wees.
'n Aankondiging oor Kleinveldt se plaasvervanger sal Saterdag ná die tweede eendagwedstryd in Oos-Londen gemaak word.
"Dit is 'n ongelukkige terugslag vir Rory," het Mohammed Moosajee, spanbestuurder, gesê.
"Hy het by die span aangesluit met 'n verrekte bobeenspier nadat hy 'n wedstryd in die SuperSport-reeks vir die Kaapse Kobras gespeel het."
Moosajee het gesê 'n sonar het gewys die spier is geskeur en die mediese span wou dit nie vererger nie.
Kleinveldt het nie in die eerste eendagwedstryd in die Paarl gespeel nie.
Suid-Afrika het dié wedstryd met 285 lopies gewen en loop met 1-0 voor in die reeks van vyf eendagwedstryde.
– Bly op hoogte van al die jongste sportnuus deur Nuus24Sport op Twitter te volg
- SAPA