Slag tref Proteas, Duminy op krukke

2012-11-09 13:48

Kaapstad – Die Proteas se veldtog in Australië het 'n knou gekry met die nuus dat JP Duminy moontlik tussen drie en ses maande op die krukkelys kan wees weens 'n hakseningbesering, het Supersport.com Vrydag berig.

Die Proteas se spanbestuur het bevestig dat Duminy Sondag 'n operasie sal ondergaan en dat sy plaasvervanger Maandag aangekondig sal word.

Kort nadat spel Vrydag op die openingsdag van die eerste toets in Brisbane weens swak lig kortgeknip is, het Duminy verkeerd getrap toe hy en sy spanmaats 'n rugbybal op die veld rondgeskop het.

Die 28-jarige, wat vier jaar gelede Suid-Afrika se held was in die historiese reekssege in Australië, is deur mediese personeel van die veld gedra.

Duminy is dadelik na 'n hospitaal geneem waar 'n skandering bevestig het dat sy haksening geskeur is.

Klik hier vir die volledige wedstrydverslag.

Vir die jongste sportnuus volg Nuus24Sport op Twitter.