Shah jag boerpot saam met Cobras
2011-09-23 07:30
Kaapstad – Die Cape Cobras hoop dat een van hul beste spelers betyds in Indië sal aanland om saam met sy spanmaats die aanslag om die boerpot van $3 miljoen (amper R24 miljoen) in die skatryk Indiese Kampioeneliga te begin.
Die voormalige Engelse toetskolwer Owais Shah het Woensdag eindelik ’n visum gekry en sal so gou as moontlik by sy Kaapse spanmaats aansluit.
Die Cobras begin hul aanslag Saterdag teen die Blues van Nieu-Suid-Wallis in Chennai.
Shah is verlede seisoen as Suid-Afrika se plaaslike Pro20-speler van die jaar aangewys en die Kaapse span hoop dat hy saam met ander groot kanonne soos Herschelle Gibbs, JP Duminy en Dale Steyn aan hulle sukses sal besorg.
Die Cobras en die Warriors is Suid-Afrika se twee verteenwoordigers in die reeks.
Die Warriors se eerste wedstryd is môre teen die Royal Challengers Bangalore.
Albei Suid-Afrikaanse spanne het reeds $500 000 (byna R4 miljoen) gekry omdat hulle gekwalifiseer het en sal ’n minimum van nog $200 000 (amper R1,6 miljoen) ontvang.
Die Warriors het ook ’n meevaller gekry toe hulle vergoed is omdat twee van hul spelers – Jacques Kallis (Kolkata Knight Riders) en Davy Jacobs (Mumbai Indians) – vir hul Indiese Premierliga-spanne gaan speel.
Die Warriors het glo $300 000 (byna R2,4 miljoen) vir die verlies van dié twee sterre ontvang.
Die ses spanne wat nie tot die halfeindronde deurdring nie, sal elk $200 000 (sowat R1,6 miljoen) ontvang.
Die twee verloorders in die halfeindronde kry $500 000 (byna R4 miljoen) elk.
Die verloorder in eindstryd kry $1,2 miljoen (sowat R9,6 miljoen) en die wenner $2,5 miljoen (sowat R20 miljoen).
Die SA spanne moet ’n gedeelte van hul prysgeld deel met die 4 SA spanne wat nie vir die reeks gekwalifiseer het nie.
- Die spanne: Chennai Super Kings, Cape Cobras, Blues (Nieu-Suid-Wallis), Mumbai Indians, Royal Challengers Bangalore, Warriors, Redbacks (Suid-Australië), Trinidad & Tobago, Somerset en Kolkata Knightriders.
Vir die jongste sportnuus volg Nuus24Sport op Twitter.
– Sport24