Sachin swyg oor wedstrydknoeiers
2010-09-07 09:40
Johannesburg – Sachin Tendulkar het Maandag op ’n mediakonferensie hier by die Wanderers-stadion geweier om te onthul of hy al in sy krieketloopbaan deur beroepswedders of wedstrydknoeiers genader is.
“Kan ons liewer net oor die Kampioeneliga-toernooi praat,” het hy gesê toe hy gevra is of hy al ooit kontak met “ongewenste karakters” gehad het.
Tendulkar glo ondanks die skade wat krieket se beeld die laaste ruk weer aangerig is deur onthullings van beweerde wedstrydknoeiery van Pakistani’s, kan ’n toernooi soos hierdie wat Vrydag in Suid-Afrika begin, baie daartoe bydra om op die goeie dinge van krieket te konsentreer.
“Maak nie saak wat gebeur nie, krieket bly ’n wonderlike spel.
“Daar sal altyd baie struikelblokke in die pad wees.
“Dit moet nie afbreuk doen aan al die wonderlike wedstryde wat gespeel word in die ware gees van die spel nie,” sê Tendulkar.
“Dit is juis nou nodig dat almal wat betrokke is by die Kampioeneliga daarop sal fokus om die goeie in krieket te laat seëvier.” Die Australiër David Hussey, kaptein van die Victoria Bushrangers van Melbourne, sê hy en sy spelers sal die spel met integriteit speel.
Dié beroep om krieket te speel soos dit veronderstel is, kom te midde van onthullings dat nog ’n Pakistanse speler deur die Internasionale Krieketraad ondersoek word.
Die Pakistanse regering het ook bevestig dat die bates van vorige en huidige spelers ondersoek gaan word.
Volgens Sapa-AP het die Federale Buro van Inkomste opdrag gegee dat die inhoud van bankrekeninge, bates en ook die aantal motors in spelers se besit oor die afgelope vyf jaar ondersoek moet word.
Tendulkar glo die Kampioeneliga, wat verlede jaar in Indië die lewenslig gesien het, het die potensiaal om ’n baie mededingende toernooi te wees.
Hy is die kaptein van die Mumbai Indians, wat Vrydag in die openingswedstryd op die Wanderers teen die Lions speel.
“Ek geniet nog my krieket en dit is vir my ’n groot uitdaging om in ’n toernooi soos hierdie teen van die beste spelers ter wêreld te staan te kom,” sê die 37-jarige Tendulkar.
Die Australiese snelbouler Peter Siddle keer in die Kampioeneliga-toernooi terug tot die veld nadat hy weens ’n rugbesering die afgelope sewe maande uit aksie was.
“Dit was verlede jaar in Indië baie moeilike toestande vir die snelboulers, maar ek glo die vinniger blaaie hier in Suid-Afrika gaan ons meer hulp verleen,” sê hy.
Bly op hoogte van al die jongste sportnuus deur Nuus24Sport op Twitter te volg.
– Sport24